[190] Catūhi kho gahapatiputta ṭhānehi apāyasahāyo amitto mittappaṭirūpako veditabbo surāmerayamajjapamādaṭṭhānānuyoge sahāyo hoti vikālavisikhācariyānuyoge sahāyo hoti samajjābhicaraṇe sahāyo hoti jūtappamādaṭṭhānānuyoge sahāyo hoti . imehi kho gahapatiputta catūhi ṭhānehi apāyasahāyo amitto mittappaṭirūpako veditabbo . Idamavoca bhagavā idaṃ vatvāna sugato athāparaṃ etadavoca satthā

[191] Aññadatthuharo mitto yo ca mitto vacīparamo anuppiyañca yo āhu apāyesu ca yo sakhā ete amitte cattāro iti viññāya paṇḍito ārakā parivajjeyya maggaṃ paṭibhayaṃ yathāti.

[192] Cattārome gahapatiputta mittā suhadā veditabbā upakārako mitto suhado veditabbo samānasukhadukkho mitto suhado veditabbo atthakkhāyī mitto suhado veditabbo anukampako mitto suhado veditabbo.

[193] Catūhi kho gahapatiputta ṭhānehi upakārako mitto suhado veditabbo pamattaṃ rakkhati pamattassa sāpateyyaṃ rakkhati bhītassa paṭisaraṇaṃ hoti uppannesu kiccesu karaṇīyesu taddiguṇaṃ bhogaṃ anuppadeti . imehi kho gahapatiputta catūhi ṭhānehi upakārako mitto suhado veditabbo.