[198] Kathañca gahapatiputta ariyasāvako chadisāpaṭicchādī hoti . Cha imā gahapatiputta disā veditabbā puratthimā disā mātāpitaro veditabbā dakkhiṇā disā ācariyā veditabbā pacchimā disā puttadārā veditabbā uttarā disā mittāmaccā veditabbā heṭṭhimā disā dāsakammakarā veditabbā uparimā disā samaṇabrāhmaṇā veditabbā.

[199] Pañcahi kho gahapatiputta ṭhānehi puttena puratthimā disā mātāpitaro paccupaṭṭhātabbā bhato nesaṃ bharissāmi kiccaṃ nesaṃ karissāmi kulavaṃsaṃ ṭhapessāmi dāyajjaṃ paṭipajjāmi athavā pana petānaṃ kālakatānaṃ dakkhiṇaṃ anuppadassāmīti . imehi kho gahapatiputta pañcahi ṭhānehi puttena puratthimā disā mātāpitaro paccupaṭṭhitā pañcahi kho ṭhānehi puttaṃ anukampanti pāpā nivārenti kalyāṇe nivesenti sippaṃ sikkhāpenti paṭirūpena dārena saññojenti samaye dāyajjaṃ niyyādenti . imehi kho gahapatiputta pañcahi ṭhānehi puttena puratthimā disā mātāpitaro paccupaṭṭhitā imehi pañcahi ṭhānehi puttaṃ anukampanti evamassa esā puratthimā disā paṭicchannā hoti khemā appaṭibhayā.

[200] Pañcahi kho gahapatiputta ṭhānehi antevāsinā dakkhiṇā disā ācariyā paccupaṭṭhātabbā uṭṭhānena upaṭṭhānena sussusāya pāricariyāya sakkaccaṃ sippaṃ paṭiggahaṇena . imehi kho gahapatiputta pañcahi ṭhānehi antevāsinā dakkhiṇā disā ācariyā paccupaṭṭhitā Pañcahi ṭhānehi antevāsiṃ anukampanti suvinītaṃ vinenti sugahitaṃ gāhāpenti sabbasippesu taṃ samakkhāyino bhavanti mittāmaccesu paṭivedenti disāsu parittāṇaṃ karonti . imehi kho gahapatiputta pañcahi ṭhānehi antevāsinā dakkhiṇā disā ācariyā paccupaṭṭhitā imehi pañcahi ṭhānehi antevāsiṃ anukampanti evamassa esā dakkhiṇā disā paṭicchannā hoti khemā appaṭibhayā.