[201] Pañcahi kho gahapatiputta ṭhānehi sāmikena pacchimā disā bhariyā paccupaṭṭhātabbā sammānanāya avimānanāya anaticariyāya issariyavossaggena alaṅkārānuppadānena . imehi kho gahapatiputta pañcahi ṭhānehi sāmikena pacchimā disā bhariyā paccupaṭṭhitā pañcahi ṭhānehi sāmikaṃ anukampanti susaṃvihitakammantā ca hoti susaṅgahitaparijanā ca anaticārinī ca sambhatañca anurakkhati dakkhā ca hoti analasā sabbakiccesu. Imehi kho gahapatiputta pañcahi ṭhānehi sāmikena pacchimā disā bhariyā paccupaṭṭhitā imehi pañcahi ṭhānehi sāmikaṃ anukampanti evamassa esā pacchimā disā paṭicchannā hoti khemā appaṭibhayā.

[202] Pañcahi kho gahapatiputta ṭhānehi kulaputtena uttarā disā mittāmaccā paccupaṭṭhātabbā dānena piyavajjena atthacariyāya samānattatāya avisaṃvādanatāya . imehi kho gahapatiputta pañcahi ṭhānehi kulaputtena uttarā disā mittāmaccā paccupaṭṭhitā Pañcahi ṭhānehi kulaputtaṃ anukampanti pamattaṃ rakkhanti pamattassa sāpateyyaṃ rakkhanti bhītassa saraṇaṃ honti āpadāsu na vijahanti aparapajaṃpissa paṭipūjenti . imehi kho gahapatiputta pañcahi ṭhānehi kulaputtena uttarā disā mittāmaccā paccupaṭṭhitā imehi pañcahi ṭhānehi kulaputtaṃ anukampanti evamassa esā uttarā disā paṭicchannā hoti khemā appaṭibhayā.

[203] Pañcahi kho gahapatiputta ṭhānehi ayirakena heṭṭhimā disā dāsakammakarā paccupaṭṭhātabbā yathābalaṃ kammantaṃ saṃvidhānena bhattavettanānuppadānena gilānupaṭṭhānena acchariyānaṃ rasānaṃ saṃvibhāgena samaye vossaggena . imehi kho gahapatiputta pañcahi ṭhānehi ayirakena heṭṭhimā disā dāsakammakarā paccupaṭṭhitā pañcahi ṭhānehi ayirakaṃ anukampanti pubbuṭṭhāyino ca honti pacchānipātino ca dinnādāyino ca sukatakammakarā ca kittivaṇṇaharā ca . imehi kho gahapatiputta pañcahi ṭhānehi ayirakena heṭṭhimā disā dāsakammakarā paccupaṭṭhitā imehi pañcahi ṭhānehi ayirakaṃ anukampanti evamassa esā heṭṭhimā disā paṭicchannā hoti khemā appaṭibhayā.