[405] Evamme sutaṃ ekaṃ samayaṃ bhagavā vesāliyaṃ viharati mahāvane kūṭāgārasālāyaṃ . tena kho pana samayena bhagavā pubbaṇhasamayaṃ sunivattho hoti pattacīvaramādāya vesāliyaṃ piṇḍāya pavisitukāmo . Atha kho saccako niganthaputto jaṅghāvihāraṃ anucaṅkamamāno anuvicaramāno yena mahāvanaṃ kūṭāgārasālā tenupasaṅkami . addasā kho āyasmā ānando saccakaṃ niganthaputtaṃ dūratova āgacchantaṃ disvāna bhagavantaṃ etadavoca ayaṃ bhante saccako niganthaputto āgacchati bhassappavādiko paṇḍitavādo sādhusammato bahujanassa eso kho bhante avaṇṇakāmo buddhassa avaṇṇakāmo dhammassa avaṇṇakāmo saṅghassa sādhu bhante bhagavā muhuttaṃ nisīdatu anukampaṃ upādāyāti . nisīdi bhagavā paññatte āsane . atha kho saccako niganthaputto yena bhagavā tenupasaṅkami upasaṅkamitvā bhagavatā saddhiṃ sammodi sammodanīyaṃ kathaṃ sārāṇīyaṃ vītisāretvā ekamantaṃ nisīdi.

[406] Ekamantaṃ nisinno kho saccako niganthaputto bhagavantaṃ etadavoca santi bho gotama eke samaṇabrāhmaṇā kāyabhāvanānuyogamanuyuttā viharanti no cittabhāvanaṃ . phusanti hi bho gotama sārīrikaṃ dukkhavedanaṃ . bhūtapubbaṃ bho gotama sārīrikāya dukkhāya vedanāya phuṭṭhassa sato ūrukkhambhopi nāma bhavissati hadayampi Nāma phalissati uṇhampi lohitaṃ mukhato uggamissati ummādampi pāpuṇissanti cittakkhepaṃ . tassa kho etaṃ bho gotama kāyanvayaṃ cittaṃ hoti kāyassa vasena vattati taṃ kissa hetu abhāvitattā cittassa . Santi pana bho gotama eke samaṇabrāhmaṇā cittabhāvanānuyogamanuyuttā viharanti no kāyabhāvanaṃ . phusanti hi bho gotama cittacetasikaṃ dukkhaṃ vedanaṃ . bhūtapubbaṃ bho gotama cetasikāya dukkhāya vedanāya phuṭṭhassa sato ūrukkhambhopi nāma bhavissati hadayampi nāma phalissati uṇhampi lohitaṃ mukhato uggamissati ummādampi pāpuṇissanti cittakkhepaṃ . tassa kho eso bho gotama cittanvayo kāyo hoti cittassa vasena vattati taṃ kissa hetu abhāvittā kāyassa . Tassa mayhaṃ bho gotama evaṃ hoti addhā bhoto gotamassa sāvakā cittabhāvanānuyogamanuyuttā viharanti no kāyabhāvananti.