[292] Evamme sutaṃ ekaṃ samayaṃ bhagavā rājagahe viharati veḷuvane kalandakanivāpe . atha kho sambahulā jātibhūmikā bhikkhū jātibhūmiyaṃ vassaṃ vuṭṭhā yena bhagavā tenupasaṅkamiṃsu upasaṅkamitvā bhagavantaṃ abhivādetvā ekamantaṃ nisīdiṃsu. {292.1} Ekamantaṃ nisinne kho te bhikkhū bhagavā etadavoca ko nu kho bhikkhave jātibhūmiyaṃ jātibhūmikānaṃ bhikkhūnaṃ sabrahmacārīnaṃ evaṃ sambhāvito attanā ca appiccho appicchakathañca bhikkhūnaṃ kattā attanā ca santuṭṭho santuṭṭhikathañca bhikkhūnaṃ kattā attanā ca pavivitto vivekakathañca bhikkhūnaṃ kattā attanā ca asaṃsaṭṭho asaṃsaggakathañca bhikkhūnaṃ kattā attanā ca āraddhaviriyo viriyārambhakathañca bhikkhūnaṃ kattā attanā ca sīlasampanno sīlasampadākathañca bhikkhūnaṃ kattā attanā ca samādhisampanno samādhisampadākathañca bhikkhūnaṃ kattā attanā ca paññāsampanno paññāsampadākathañca bhikkhūnaṃ kattā attanā ca vimuttisampanno vimuttisampadākathañca bhikkhūnaṃ kattā attanā ca vimuttiñāṇadassanasampanno vimuttiñāṇadassanasampadākathañca bhikkhūnaṃ kattā ovādako viññāpako sandassako samādapako samuttejako sampahaṃsako sabrahmacārīnanti . puṇṇo nāma bhante āyasmā Mantāṇiputto jātibhūmiyaṃ jātibhūmikānaṃ bhikkhūnaṃ sabrahmacārīnaṃ evaṃ sambhāvito attanā ca appiccho appicchakathañca bhikkhūnaṃ kattā attanā ca santuṭṭho .pe. attanā ca pavivitto ... attanā ca asaṃsaṭṭho ... Attanā ca āraddhaviriyo ... Attanā ca sīlasampanno ... Attanā ca samādhisampanno ... attanā ca paññāsampanno ... Attanā ca vimuttisampanno ... attanā ca vimuttiñāṇadassanasampanno vimuttiñāṇadassanasampadākathañca bhikkhūnaṃ kattā ovādako viññāpako sandassako samādapako samuttejako sampahaṃsako sabrahmacārīnanti.

[293] Tena kho pana samayena āyasmā sārīputto bhagavato avidūre nisinno hoti . atha kho āyasmato sārīputtassa etadahosi lābhā āyasmato puṇṇassa mantāṇiputtassa suladdhaṃ āyasmato puṇṇassa mantāṇiputtassa yassa viññū sabrahmacārī satthu sammukhā anumāssa anumāssa vaṇṇaṃ bhāsanti tañca satthā abbhanumodati appevanāma mayampi kadāci karahaci āyasmatā puṇṇena mantāṇiputtena saddhiṃ samāgamaṃ gaccheyyāma appevanāma siyā kocideva kathāsallāpoti.