[369] Evamme sutaṃ ekaṃ samayaṃ bhagavā gosiṅgasālavanadāye viharati sambahulehi abhiññātehi abhiññātehi therehi sāvakehi saddhiṃ āyasmatā ca sārīputtena āyasmatā ca mahāmoggallānena āyasmatā ca mahākassapena āyasmatā ca anuruddhena āyasmatā ca revatena āyasmatā ca ānandena aññehi ca abhiññātehi abhiññātehi therehi sāvakehi saddhiṃ . atha kho āyasmā mahāmoggallāno sāyaṇhasamayaṃ paṭisallānā vuṭṭhito yenāyasmā mahākassapo tenupasaṅkami upasaṅkamitvā āyasmantaṃ mahākassapaṃ etadavoca āyāmāvuso kassapa yenāyasmā sārīputto tenupasaṅkamissāma dhammassavanāyāti . evamāvusoti kho āyasmā mahākassapo āyasmato mahāmoggallānassa paccassosi. {369.1} Atha kho āyasmā ca mahāmoggallāno āyasmā ca mahākassapo āyasmā ca anuruddho yenāyasmā sārīputto tenupasaṅkamiṃsu dhammassavanāya . addasā kho āyasmā ānando āyasmantañca mahāmoggallānaṃ āyasmantañca mahākassapaṃ āyasmantañca anuruddhaṃ yenāyasmā sārīputto tenupasaṅkamante dhammassavanāya disvāna yenāyasmā revato tenupasaṅkami upasaṅkamitvā āyasmantaṃ revataṃ etadavoca upasaṅkamantā kho amū āvuso revata sappurisā yenāyasmā Sārīputto tena dhammassavanāya āyāmāvuso revata yenāyasmā sārīputto tenupasaṅkamissāma dhammassavanāyāti . evamāvusoti kho āyasmā revato āyasmato ānandassa paccassosi . atha kho āyasmā ca revato āyasmā ca ānando yenāyasmā sārīputto tenupasaṅkamiṃsu dhammassavanāya.

[370] Addasā kho āyasmā sārīputto āyasmantañca revataṃ āyasmantañca ānandaṃ dūratova āgacchante disvāna āyasmantaṃ ānandaṃ etadavoca etu kho āyasmā ānando svāgataṃ āyasmato ānandassa bhagavato upaṭṭhākassa bhagavato santikāvacarassa ramaṇīyaṃ āvuso ānanda gosiṅgasālavanaṃ dosinā ratti sabbaphāliphullā sālā dibbā maññe gandhā sampavanti kathaṃrūpena āvuso ānanda bhikkhunā gosiṅgasālavanaṃ sobheyyāti. {370.1} Idhāvuso sārīputta bhikkhu bahussuto hoti sutadharo sutasanniccayo ye te dhammā ādikalyāṇā majjhekalyāṇā pariyosānakalyāṇā sātthā sabyañjanā kevalaparipuṇṇaṃ parisuddhaṃ brahmacariyaṃ abhivadanti tathārūpāssa dhammā bahussutā honti dhatā vacasā paricitā manasānupekkhitā diṭṭhiyā supaṭividdhā so catassannaṃ parisānaṃ dhammaṃ deseti parimaṇḍalehi padabyañjanehi anuppabandhehi anusayasamugghātāya evarūpena kho āvuso sārīputta bhikkhunā gosiṅgasālavanaṃ sobheyyāti.