[395] Tena kho pana samayena sambahulā bhikkhū abbhokāse caṅkamanti . atha kho saccako niganthaputto yena te bhikkhū tenupasaṅkami upasaṅkamitvā te bhikkhū etadavoca kahannukho bho etarahi so bhavaṃ gotamo viharati dassanakāmā hi mayaṃ taṃ bhavantaṃ gotamanti . esa aggivessana bhagavā mahāvanaṃ ajjhogāhetvā aññatarasmiṃ rukkhamūle divāvihāraṃ nisinnoti . atha kho saccako niganthaputto mahatiyā licchaviparisāya saddhiṃ mahāvanaṃ ajjhogāhetvā yena bhagavā tenupasaṅkami upasaṅkamitvā bhagavatā saddhiṃ sammodi sammodanīyaṃ kathaṃ sārāṇīyaṃ vītisāretvā ekamantaṃ nisīdi . tepi kho licchavī appekacce bhagavantaṃ abhivādetvā ekamantaṃ nisīdiṃsu . Appekacce bhagavatā saddhiṃ sammodiṃsu sammodanīyaṃ kathaṃ sārāṇīyaṃ vītisāretvā ekamantaṃ nisīdiṃsu . appekacce yena bhagavā tenañjalimpaṇāmetvā ekamantaṃ nisīdiṃsu . appekacce bhagavato santike nāmagottaṃ sāvetvā ekamantaṃ nisīdiṃsu . appekacce tuṇhībhūtā ekamantaṃ nisīdiṃsu.
[396] Ekamantaṃ nisinno kho saccako niganthaputto bhagavantaṃ etadavoca puccheyyāhaṃ bhavantaṃ gotamaṃ kiñcideva desaṃ sace me bhavaṃ gotamo okāsaṃ karoti pañhassa veyyākaraṇāyāti . puccha Aggivessana yadākaṅkhasīti . kathaṃ pana bhavaṃ gotamo sāvake vineti kathaṃbhāgā ca pana bhoto gotamassa sāvakesu anusāsanī bahulā pavattatīti . evaṃ kho ahaṃ aggivessana sāvake vinemi evaṃbhāgā ca pana me sāvakesu anusāsanī bahulā pavattati rūpaṃ bhikkhave aniccaṃ vedanā aniccā saññā aniccā saṅkhārā aniccā viññāṇaṃ aniccaṃ rūpaṃ bhikkhave anattā vedanā anattā saññā anattā saṅkhārā anattā viññāṇaṃ anattā sabbe saṅkhārā anattā sabbe dhammā anattāti evaṃ kho ahaṃ aggivessana sāvake vinemi evaṃbhāgā ca pana me sāvakesu anusāsanī bahulā pavattatīti. {396.1} Upamā maṃ bho gotama paṭibhātīti . paṭibhātu taṃ aggivessanāti bhagavā avoca . seyyathāpi bho gotama yekecime vījagāmabhūtagāmā vuḍḍhiṃ virūḷhiṃ vepullaṃ āpajjanti sabbe te paṭhaviṃ nissāya paṭhaviyaṃ patiṭṭhāya evamete vījagāmabhūtagāmā vuḍḍhiṃ virūḷhiṃ vepullaṃ āpajjanti seyyathāpi vā pana bho gotama yekecime balakaraṇīyā kammantā karīyanti sabbe te paṭhaviṃ nissāya paṭhaviyaṃ patiṭṭhāya evamete balakaraṇīyā kammantā karīyanti evameva kho bho gotama rūpattāyaṃ purisapuggalo rūpe patiṭṭhāya puññaṃ vā apuññaṃ vā pasavati vedanattāyaṃ purisapuggalo vedanāya patiṭṭhāya puññaṃ vā apuññaṃ vā pasavati saññattāyaṃ purisapuggalo saññāya patiṭṭhāya puññaṃ vā apuññaṃ vā pasavati saṅkhārattāyaṃ purisapuggalo Saṅkhāresu patiṭṭhāya puññaṃ vā apuññaṃ vā pasavati viññāṇattāyaṃ purisapuggalo viññāṇe patiṭṭhāya puññaṃ vā apuññaṃ vā pasavatīti . nanu taṃ aggivessana evaṃ vadesi rūpaṃ me attā vedanā me attā saññā me attā saṅkhārā me attā viññāṇaṃ me attāti . ahaṃ hi bho gotama evaṃ vadāmi rūpaṃ me attā vedanā me attā saññā me attā saṅkhārā me attā viññāṇaṃ me attāti ayañca mahatī janatāti . kiṃ hi te aggivessana mahatī janatā karissati iṅgha tvaṃ aggivessana sakaṃyeva vādaṃ nibbedhehīti . ahaṃ hi bho gotama evaṃ vadāmi rūpaṃ me attā vedanā me attā saññā me attā saṅkhārā me attā viññāṇaṃ me attāti.