[397] Tenahi aggivessana taññevettha paṭipucchissāmi yathā te khameyya tathā naṃ byākareyyāsi taṃ kiṃ maññasi aggivessana vatteyya rañño khattiyassa muddhāvasittassa sakasmiṃ vijite vaso ghātetāyaṃ vā ghātetuṃ jāpetāyaṃ vā jāpetuṃ pabbājetāyaṃ vā pabbājetuṃ seyyathāpi rañño pasenadissa kosalassa seyyathāpi vā pana rañño māgadhassa ajātasattussa vedehiputtassāti . Vatteyya bho gotama rañño khattiyassa muddhāvasittassa sakasmiṃ vijite vaso ghātetāyaṃ vā ghātetuṃ jāpetāyaṃ vā jāpetuṃ pabbājetāyaṃ vā pabbājetuṃ seyyathāpi rañño pasenadissa Kosalassa seyyathāpi vā pana rañño māgadhassa ajātasattussa vedehiputtassa imesampi hi bho gotama saṅghānaṃ gaṇānaṃ seyyathīdaṃ vajjīnaṃ mallānaṃ vattati sakasmiṃ vijite vaso ghātetāyaṃ vā ghātetuṃ jāpetāyaṃ vā jāpetuṃ pabbājetāyaṃ vā pabbājetuṃ kiṃ pana rañño khattiyassa muddhāvasittassa seyyathāpi rañño pasenadissa kosalassa seyyathāpi vā pana rañño māgadhassa ajātasattussa vedehiputtassa vatteyya bho gotama vattituñcamarahatīti. {397.1} Taṃ kiṃ maññasi aggivessana yaṃ tvaṃ evaṃ vadesi rūpaṃ me attāti vattati te tasmiṃ rūpe vaso evaṃ me rūpaṃ hotu evaṃ me rūpaṃ mā ahosīti . evaṃ vutte saccako niganthaputto tuṇhī ahosi . dutiyampi kho bhagavā saccakaṃ niganthaputtaṃ etadavoca taṃ kiṃ maññasi aggivessana yaṃ tvaṃ evaṃ vadesi rūpaṃ me attāti vattati te tasmiṃ rūpe vaso evaṃ me rūpaṃ hotu evaṃ me rūpaṃ mā ahosīti . evaṃ vutte dutiyampi kho saccako niganthaputto tuṇhī ahosi. {397.2} Atha kho bhagavā saccakaṃ niganthaputtaṃ etadavoca byākarohidāni aggivessana nadāni te tuṇhībhāvassa kālo yo kho aggivessana tathāgatena yāvatatiyaṃ sahadhammikaṃ pañhaṃ puṭṭho na byākaroti etthevassa sattadhā muddhā phalissatīti . Tena kho pana samayena vajirapāṇī yakkho ayasaṃ vajiraṃ ādāya ādittaṃ sampajjalitaṃ saṃjotibhūtaṃ saccakassa niganthaputtassa uparivehāya saṇṭhito hoti Sacāyaṃ saccako niganthaputto bhagavatā yāvatatiyaṃ sahadhammikaṃ pañhaṃ puṭṭho na byākaroti etthevassa sattadhā muddhaṃ phālessāmīti. Taṃ kho pana vajirapāṇiṃ yakkhaṃ bhagavā ceva passati saccako ca niganthaputto . atha kho saccako niganthaputto bhīto saṃviggo lomahaṭṭhajāto bhagavantaṃyeva tāṇaṃ gavesī bhagavantaṃyeva leṇaṃ gavesī bhagavantaṃyeva saraṇaṃ gavesī bhagavantaṃ etadavoca pucchatu maṃ bhavaṃ gotamo byākarissāmīti.