[399] Seyyathāpi aggivessana puriso sāratthiko sāragavesī sārapariyesanaṃ caramāno tiṇhaṃ kudhāriṃ ādāya vanaṃ paviseyya so tattha passeyya mahantaṃ kadalikkhandhaṃ ujuṃ navaṃ akukkuṭajātaṃ tamenaṃ mūle chindeyya mūle chetvā agge chindeyya agge chetvā pattavaṭṭiṃ vinibbhujeyya so tattha pattavaṭṭiṃ vinibbhujanto phegguṃpi nādhigaccheyya kuto sāraṃ evameva kho tvaṃ aggivessana mayā sakasmiṃ vāde samanuyuñjiyamāno samanubhāsiyamāno samanuggāhiyamāno ritto tuccho aparaddho bhāsitā kho pana te esā aggivessana vesāliyaṃ parisati vācā nāhantaṃ passāmi samaṇaṃ vā brāhmaṇaṃ vā saṅghiṃ gaṇiṃ gaṇācariyaṃ apica arahantaṃ sammāsambuddhaṃ paṭijānamānaṃ yo mayā vādena vādaṃ samāraddho na saṅkampeyya na sampakampeyya Na sampavedheyya yassa na kacchehi sedā muñceyyuṃ thūṇañcepāhaṃ acetanaṃ vādena vādaṃ samārabheyyaṃ sāpi mayā vādena vādaṃ samāraddhā saṅkampeyya sampakampeyya sampavedheyya ko pana vādo manussabhūtassāti tuyhaṃ kho pana aggivessana appekaccāni sedaphusitāni nalāṭamuttāni uttarāsaṅgaṃ vinibbhinditvā bhūmiyaṃ patiṭṭhitāni mayhaṃ kho pana aggivessana natthi etarahi kāyasmiṃ sedoti . iti bhagavā tasmiṃ parisati suvaṇṇavaṇṇaṃ kāyaṃ vivari . evaṃ vutte saccako niganthaputto tuṇhībhūto maṅkubhūto pattakkhandho adhomukho pajjhāyanto appaṭibhāṇo nisīdi.
[400] Atha kho dummukho licchaviputto saccakaṃ niganthaputtaṃ tuṇhībhūtaṃ maṅkubhūtaṃ pattakkhandhaṃ adhomukhaṃ pajjhāyantaṃ appaṭibhāṇaṃ viditvā bhagavantaṃ etadavoca upamā maṃ bhagavā paṭibhātīti . Paṭibhātu taṃ dummukhāti bhagavā avoca . seyyathāpi bhante gāmassa vā nigamassa vā avidūre pokkharaṇī tatrassa kakkaṭako atha kho bhante sambahulā kumārakā vā kumārikā vā tamhā gāmā vā nigamā vā nikkhamitvā yena sā pokkharaṇī tenupasaṅkameyyuṃ upasaṅkamitvā taṃ pokkharaṇiṃ ogāhetvā taṃ kakkaṭakaṃ udakā uddharitvā thale patiṭṭhāpeyyuṃ yaññadeva hi so bhante kakkaṭako aḷaṃ abhininnāmeyya taṃtadeva te kumārakā vā kumārikā vā kaṭṭhena vā kaṭhalena vā sañchindeyyuṃ sambhañjeyyuṃ sampalibhañjeyyuṃ Evañhi so bhante kakkaṭako sabbehi aḷehi sañchinnehi sambhaggehi sampalibhaggehi abhabbo taṃ pokkharaṇiṃ puna otarituṃ seyyathāpi pubbe evameva kho bhante yāni saccakassa niganthaputtassa visūkāyitāni visevitāni vipphanditāni kānici kānici tāni bhagavatā sañchinnāni sambhaggāni sampalibhaggāni abhabbo cadāni bhante saccako niganthaputto puna bhagavantaṃ upasaṅkamituṃ yadidaṃ vādādhippāyoti . Evaṃ vutte saccako niganthaputto dummukhaṃ licchaviputtaṃ etadavoca āgamehi tvaṃ dummukha āgamehi tvaṃ dummukha mukharosi tvaṃ dummukha na mayaṃ tayā saddhiṃ mantema idha mayaṃ bhotā gotamena saddhiṃ mantema tiṭṭhatesā bho gotama amhākañceva aññesañca puthusamaṇabrāhmaṇānaṃ vācāvilāpaṃ vilapitaṃ maññeti.