[403] Evaṃ vutte saccako niganthaputto bhagavantaṃ etadavoca mayameva bho gotama dhaṃsī mayaṃ pagabbhā ye mayaṃ bhavantaṃ gotamaṃ vādena vādaṃ āsādetabbaṃ amaññimha siyā hi bho gotama hatthiṃ pabhinnaṃ āsajja purisassa sotthibhāvo na tveva bhavantaṃ gotamaṃ āsajja purisassa sotthibhāvo siyā hi bho gotama pajjalitaṃ aggikkhandhaṃ āsajja purisassa sotthibhāvo na tveva bhavantaṃ gotamaṃ āsajja siyā purisassa sotthibhāvo siyā hi bho gotama āsīvisaṃ ghoravisaṃ āsajja purisassa sotthibhāvo na tveva bhavantaṃ gotamaṃ āsajja siyā purisassa sotthibhāvo mayameva bho gotama dhaṃsī mayaṃ pagabbhā ye mayaṃ bhavantaṃ gotamaṃ vādena vādaṃ āsādetabbaṃ amaññimha adhivāsetu me bhavaṃ gotamo svātanāya bhattaṃ saddhiṃ bhikkhusaṅghenāti. Adhivāsesi bhagavā tuṇhībhāvena. {403.1} Atha kho saccako niganthaputto bhagavato adhivāsanaṃ viditvā te licchavī āmantesi suṇantu me bhonto licchavī samaṇo gotamo nimantito svātanāya Saddhiṃ bhikkhusaṅghena yena me abhihareyyātha yamassa paṭirūpaṃ maññeyyāthāti . atha kho te licchavī tassā rattiyā accayena saccakassa niganthaputtassa pañcamattāni thālipākasatāni bhattābhihāraṃ abhihariṃsu . atha kho saccako niganthaputto sake ārāme paṇītaṃ khādanīyaṃ bhojanīyaṃ paṭiyādāpetvā bhagavato kālaṃ ārocāpesi kālo bho gotama niṭṭhitaṃ bhattanti.
[404] Atha kho bhagavā pubbaṇhasamayaṃ nivāsetvā pattacīvaramādāya yena saccakassa niganthaputtassa ārāmo tenupasaṅkami upasaṅkamitvā paññatte āsane nisīdi saddhiṃ bhikkhusaṅghena . atha kho saccako niganthaputto buddhappamukhaṃ bhikkhusaṅghaṃ paṇītena khādanīyena bhojanīyena sahatthā santappesi sampavāresi . atha kho saccako niganthaputto bhagavantaṃ bhuttāviṃ onītapattapāṇiṃ aññataraṃ nīcāsanaṃ gahetvā ekamantaṃ nisīdi . ekamantaṃ nisinno kho saccako niganthaputto bhagavantaṃ etadavoca yamidaṃ bho gotama dāne puññañca puññamahī ca taṃ dāyakānaṃ sukhāyeva hotūti . yaṃ kho aggivessana tādisaṃ dakkhiṇeyyaṃ āgamma avītarāgaṃ avītadosaṃ avītamohaṃ taṃ dāyakānaṃ bhavissati yaṃ kho aggivessana mādisaṃ dakkhiṇeyyaṃ āgamma vītarāgaṃ vītadosaṃ vītamohaṃ taṃ tuyhaṃ bhavissatīti. Cūḷasaccakasuttaṃ niṭṭhitaṃ pañcamaṃ. --------