[417] Tassa mayhaṃ aggivessana etadahosi yannūnāhaṃ dantebhi dantamādhāya jivhāya tāluṃ āhacca cetasā cittaṃ abhiniggaṇheyyaṃ abhinippīḷeyyaṃ abhisantāpeyyanti . so kho ahaṃ aggivessana dantebhi dantamādhāya jivhāya tāluṃ āhacca cetasā cittaṃ abhiniggaṇhāmi abhinippīḷemi abhisantāpemi tassa mayhaṃ aggivessana dantebhi dantamādhāya jivhāya tāluṃ āhacca cetasā cittaṃ abhiniggaṇhato Abhinippīḷayato abhisantāpayato kacchehi sedā muccanti . seyyathāpi aggivessana balavā puriso dubbalataraṃ purisaṃ sīse vā gahetvā khandhe vā gahetvā abhiniggaṇheyya abhinippīḷeyya abhisantāpeyya evameva kho me aggivessana dantebhi dantamādhāya jivhāya tāluṃ āhacca cetasā cittaṃ abhiniggaṇhato abhinippīḷayato abhisantāpayato kacchehi sedā muccanti . āraddhaṃ kho pana me aggivessana viriyaṃ hoti asallīnaṃ upaṭṭhitā sati appammuṭṭhā sāraddho ca pana me kāyo hoti appaṭippassaddho teneva dukkhappadhānena padhānābhitunnassa sato . evarūpāpi kho me aggivessana uppannā dukkhā vedanā cittaṃ na pariyādāya tiṭṭhati.
[418] Tassa mayhaṃ aggivessana etadahosi yannūnāhaṃ appāṇakaṃyeva jhānaṃ jhāyeyyanti . so kho ahaṃ aggivessana mukhato ca nāsato ca assāsapassāse uparundhiṃ . tassa mayhaṃ aggivessana mukhato ca nāsato ca assāsapassāsesu uparuddhesu kaṇṇasotehi vātānaṃ nikkhantānaṃ adhimatto saddo hoti . Seyyathāpi nāma kammāragaggariyā dhamamānāya adhimatto saddo hoti evameva kho me aggivessana mukhato ca nāsato ca assāsapassāsesu uparuddhesu kaṇṇasotehi vātānaṃ nikkhantānaṃ adhimatto saddo hoti . āraddhaṃ kho pana me aggivessana viriyaṃ hoti asallīnaṃ upaṭṭhitā sati appammuṭṭhā sāraddho ca Pana me kāyo hoti appaṭippassaddho teneva dukkhappadhānena padhānābhitunnassa sato . evarūpāpi kho aggivessana uppannā dukkhā vedanā cittaṃ na pariyādāya tiṭṭhati.
[419] Tassa mayhaṃ aggivessana etadahosi yannūnāhaṃ appāṇakaṃyeva jhānaṃ jhāyeyyanti . so kho ahaṃ aggivessana mukhato ca nāsato ca kaṇṇato ca assāsapassāse uparundhiṃ . Tassa mayhaṃ aggivessana mukhato ca nāsato ca kaṇṇato ca assāsapassāsesu uparuddhesu adhimattā vātā muddhānaṃ ohananti . Seyyathāpi aggivessana balavā puriso tiṇhena sikharena muddhānaṃ abhimattheyya evameva kho me aggivessana mukhato ca nāsato ca kaṇṇato ca assāsapassāsesu uparuddhesu adhimattā vātā muddhānaṃ ohananti . āraddhaṃ kho pana me aggivessana viriyaṃ hoti asallīnaṃ upaṭṭhitā sati appammuṭṭhā sāraddho ca pana me kāyo hoti appaṭippassaddho teneva dukkhappadhānena padhānābhitunnassa sato . Evarūpāpi kho me aggivessana uppannā dukkhā vedanā cittaṃ na pariyādāya tiṭṭhati.