[495] Vedanā vedanāti āvuso vuccati kittāvatā nu kho Āvuso vedanāti vuccatīti . vedeti vedetīti kho āvuso tasmā vedanāti vuccati kiñca vedeti sukhampi vedeti dukkhampi vedeti adukkhamasukhampi vedeti vedeti vedetīti kho āvuso tasmā vedanāti vuccatīti . saññā saññāti āvuso vuccati kittāvatā nu kho āvuso saññāti vuccatīti . sañjānāti sañjānātīti kho āvuso tasmā saññāti vuccati kiñca sañjānāti nīlakampi sañjānāti pītakampi sañjānāti lohitakampi sañjānāti odātampi sañjānāti sañjānāti sañjānātīti kho āvuso tasmā saññāti vuccatīti. {495.1} Yā cāvuso vedanā yā ca saññā yañca viññāṇaṃ ime dhammā saṃsaṭṭhā udāhu visaṃsaṭṭhā labbhā ca panimesaṃ dhammānaṃ vinibbhujitvā vinibbhujitvā nānākaraṇaṃ paññāpetunti . Yā cāvuso vedanā yā ca saññā yañca viññāṇaṃ ime dhammā saṃsaṭṭhā no visaṃsaṭṭhā na ca labbhā imesaṃ dhammānaṃ vinibbhujitvā vinibbhujitvā nānākaraṇaṃ paññāpetuṃ yaṃ cāvuso vedeti taṃ sañjānāti yaṃ vijānāti taṃ vijānāti tasmā ime dhammā saṃsaṭṭhā no visaṃsaṭṭhā na ca labbhā imesaṃ dhammānaṃ vinibbhujitvā vinibbhujitvā nānākaraṇaṃ paññāpetunti.
[496] Nissaṭṭhena hāvuso pañcahi indriyehi parisuddhena manoviññāṇena kiṃ neyyanti . nissaṭṭhena ca āvuso pañcahi indriyehi parisuddhena manoviññāṇena ananto ākāsoti Ākāsānañcāyatanaṃ neyyaṃ anantaṃ viññāṇanti viññāṇañcāyatanaṃ neyyaṃ natthi kiñcīti ākiñcaññāyatanaṃ neyyanti . neyyaṃ panāvuso dhammaṃ kena jānātīti . neyyaṃ kho āvuso dhammaṃ paññācakkhunā jānātīti . paññā panāvuso kimatthiyāti . paññā kho āvuso abhiññatthā pariññatthā pahānatthāti.
[497] Katī panāvuso paccayā sammādiṭṭhiyā uppādāyāti . Dve kho āvuso paccayā sammādiṭṭhiyā uppādāya parato ca ghoso yoniso ca manasikāro ime kho āvuso dve paccayā sammādiṭṭhiyā uppādāyāti . katīhi panāvuso aṅgehi anuggahitā sammādiṭṭhi cetovimuttiphalā ca hoti cetovimuttiphalānisaṃsā ca paññāvimuttiphalā ca hoti paññāvimuttiphalānisaṃsā cāti. {497.1} Pañcahi kho āvuso aṅgehi anuggahitā sammādiṭṭhi cetovimuttiphalā ca hoti cetovimuttiphalānisaṃsā ca paññāvimuttiphalā ca hoti paññāvimuttiphalānisaṃsā ca idhāvuso sammādiṭṭhi sīlānuggahitā ca hoti sutānuggahitā ca hoti sākacchānuggahitā ca hoti samathānuggahitā ca hoti vipassanānuggahitā ca hoti imehi kho āvuso pañcahaṅgehi anuggahitā sammādiṭṭhi cetovimuttiphalā ca hoti cetovimuttiphalānisaṃsā ca paññāvimuttiphalā ca hoti paññāvimuttiphalānisaṃsā cāti.