[512] Sukhāya panayye vedanāya kiṃ paṭibhāgoti . sukhāya kho āvuso visākha vedanāya rāgo paṭibhāgoti . dukkhāya panayye vedanāya kiṃ paṭibhāgoti . dukkhāya kho āvuso visākha vedanāya paṭigho paṭibhāgoti . adukkhamasukhāya panayye vedanāya kiṃ paṭibhāgoti . adukkhamasukhāya kho āvuso visākha vedanāya avijjā paṭibhāgoti . avijjāya panayye kiṃ paṭibhāgoti . avijjāya kho āvuso visākha vijjā paṭibhāgoti . vijjāya panayye kiṃ paṭibhāgoti. Vijjāya kho āvuso visākha vimutti paṭibhāgoti . vimuttiyā Panayye kiṃ paṭibhāgoti . vimuttiyā kho visākha nibbānaṃ paṭibhāgoti. Nibbānassa panayye kiṃ paṭibhāgoti . accasarāvuso visākha pañhaṃ nāsakkhi pañhānaṃ pariyantaṃ gahetuṃ nibbānogadhaṃ hi āvuso visākha brahmacariyaṃ nibbānaparāyanaṃ nibbānapariyosānaṃ ākaṅkhamāno ce tvaṃ āvuso visākha bhagavantaṃ upasaṅkamitvā etamatthaṃ puccheyyāsi yathā ca te bhagavā byākaroti tathā naṃ dhāreyyāsīti.

[513] Atha kho visākho upāsako dhammadinnāya bhikkhuniyā bhāsitaṃ abhinanditvā anumoditvā uṭṭhāyāsanā dhammadinnaṃ bhikkhuniṃ abhivādetvā padakkhiṇaṃ katvā yena bhagavā tenupasaṅkami upasaṅkamitvā bhagavantaṃ abhivādetvā ekamantaṃ nisīdi . ekamantaṃ nisinno kho visākho upāsako yāvatako ahosi dhammadinnāya bhikkhuniyā saddhiṃ kathāsallāpo taṃ sabbaṃ bhagavato ārocesi . Evaṃ vutte bhagavā visākhaṃ upāsakaṃ etadavoca paṇḍitā visākha dhammadinnā bhikkhunī mahāpaññā visākha dhammadinnā bhikkhunī mañcepi tvaṃ visākha etamatthaṃ paṭipuccheyyāsi ahampi taṃ evameva byākareyyaṃ yathā taṃ dhammadinnāya bhikkhuniyā byākataṃ esovetassa attho evametaṃ dhārehīti. Idamavoca bhagavā attamano visākho upāsako bhagavato bhāsitaṃ abhinandīti. Cūḷavedallasuttaṃ niṭṭhitaṃ catutthaṃ. ---------