[518] Katamañca bhikkhave dhammasamādānaṃ paccuppannadukkhaṃ āyatiṃ sukhavipākaṃ . idha bhikkhave ekacco pakatiyā tibbarāgajātiko hoti so abhikkhaṇaṃ rāgajaṃ dukkhaṃ domanassaṃ paṭisaṃvedeti . pakatiyā tibbadosajātiko hoti so abhikkhaṇaṃ dosajaṃ dukkhaṃ domanassaṃ paṭisaṃvedeti . pakatiyā tibbamohajātiko hoti so abhikkhaṇaṃ mohajaṃ dukkhaṃ domanassaṃ paṭisaṃvedeti . so sahāpi dukkhena sahāpi domanassena phuṭṭho samāno assumukhopi rodamāno paripuṇṇaṃ parisuddhaṃ brahmacariyaṃ carati . so kāyassa bhedā parammaraṇā sugatiṃ saggaṃ lokaṃ upapajjati . idaṃ vuccati bhikkhave dhammasamādānaṃ paccuppannadukkhaṃ āyatiṃ sukhavipākaṃ.

[519] Katamañca bhikkhave dhammasamādānaṃ paccuppannasukhañceva āyatiñca sukhavipākaṃ . idha bhikkhave ekacco pakatiyā na tibbarāgajātiko hoti so abhikkhaṇaṃ na rāgajaṃ dukkhaṃ domanassaṃ paṭisaṃvedeti . Pakatiyā na tibbadosajātiko hoti so abhikkhaṇaṃ na dosajaṃ dukkhaṃ domanassaṃ paṭisaṃvedeti . pakatiyā na tibbamohajātiko hoti so abhikkhaṇaṃ na mohajaṃ dukkhaṃ domanassaṃ paṭisaṃvedeti . So vivicceva kāmehi vivicca akusalehi dhammehi savitakkaṃ savicāraṃ Vivekajaṃ pītisukhaṃ paṭhamaṃ jhānaṃ upasampajja viharati . vitakkavicārānaṃ vūpasamā ajjhattaṃ sampasādanaṃ cetaso ekodibhāvaṃ avitakkaṃ avicāraṃ samādhijaṃ pītisukhaṃ dutiyaṃ jhānaṃ ... tatiyaṃ jhānaṃ ... catutthaṃ jhānaṃ upasampajja viharati . so kāyassa bhedā parammaraṇā sugatiṃ saggaṃ lokaṃ upapajjati . idaṃ vuccati bhikkhave dhammasamādānaṃ paccuppannasukhañceva āyatiñca sukhavipākaṃ . imāni kho bhikkhave cattāri dhammasamādānānīti. Idamavoca bhagavā attamanā te bhikkhū bhagavato bhāsitaṃ abhinandunti. Cūḷadhammasamādānasuttaṃ niṭṭhitaṃ pañcamaṃ. ----------