[533] Seyyathāpi bhikkhave dadhi ca madhu ca sappi ca phāṇitañca ekajjhaṃ saṃsaṭṭhaṃ . atha puriso āgaccheyya lohitapakkhandiko . Tamenaṃ evaṃ vadeyyuṃ ambho purisa idaṃ dadhi ca madhu ca sappi ca phāṇitañca ekajjhaṃ saṃsaṭṭhaṃ sace ākaṅkhasi piva tassa te pivato ceva chādessati vaṇṇenapi gandhenapi rasenapi pivitvā ca pana sukhī bhavissatīti . so taṃ paṭisaṅkhāya piveyya nappaṭinissajjeyya tassa taṃ pivato ceva chādeyya vaṇṇenapi gandhenapi rasenapi pivitvā ca pana sukhī assa tathūpamāhaṃ bhikkhave imaṃ dhammasamādānaṃ vadāmi yadidaṃ dhammasamādānaṃ paccuppannasukhañceva āyatiñca sukhavipākaṃ.

[534] Seyyathāpi bhikkhave vassānaṃ pacchime māse saradasamaye viddhe vigatavalāhake deve ādicco nabhaṃ abbhussakkamāno sabbaṃ ākāsagataṃ tamagataṃ abhivihacca bhāsati ca tapati ca virocati ca Evameva kho bhikkhave yadidaṃ dhammasamādānaṃ paccuppannasukhañceva āyatiñca sukhavipākaṃ tadaññe puthusamaṇabrāhmaṇaparappavāde abhivihacca bhāsati ca tapati ca virocati cāti idamavoca bhagavā attamanā te bhikkhū bhagavato bhāsitaṃ abhinandunti. Mahādhammasamādānasuttaṃ niṭṭhitaṃ chaṭṭhaṃ. --------