[110] Evamme sutaṃ ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme . tatra kho āyasmā sārīputto bhikkhū āmantesi āvuso bhikkhavoti . āvusoti [1]- te bhikkhū āyasmato sārīputtassa paccassosuṃ . āyasmā sārīputto etadavoca sammādiṭṭhi sammādiṭṭhīti āvuso vuccati kittāvatā nu kho āvuso ariyasāvako sammādiṭṭhī hoti ujugatāssa diṭṭhi dhamme aveccappasādena samannāgato āgato imaṃ saddhammanti. {110.1} Dūratopi kho mayaṃ āvuso āgaccheyyāma āyasmato sārīputtassa santike etassa bhāsitassa atthamaññātuṃ sādhu vatāyasmantaṃyeva sārīputtaṃ paṭibhātu etassa bhāsitassa attho āyasmato sārīputtassa sutvā bhikkhū dhāressantīti . tenahi āvuso suṇātha sādhukaṃ manasikarotha bhāsissāmīti . evamāvusoti kho te bhikkhū āyasmato sārīputtassa paccassosuṃ.

[111] Āyasmā sārīputto etadavoca yato kho āvuso ariyasāvako akusalañca pajānāti akusalamūlañca pajānāti kusalañca pajānāti kusalamūlañca pajānāti ettāvatāpi kho āvuso ariyasāvako sammādiṭṭhī hoti ujugatāssa diṭṭhi dhamme aveccappasādena Samannāgato āgato imaṃ saddhammanti. {111.1} Katamaṃ panāvuso akusalaṃ [1]- . pāṇātipāto kho āvuso akusalaṃ adinnādānaṃ akusalaṃ kāmesumicchācāro akusalaṃ musāvādo akusalaṃ pisuṇā vācā akusalaṃ pharusā vācā akusalaṃ samphappalāpo akusalaṃ abhijjhā akusalaṃ byāpādo akusalaṃ micchādiṭṭhi akusalaṃ idaṃ vuccatāvuso akusalaṃ . katamañcāvuso akusalamūlaṃ . lobho akusalamūlaṃ doso akusalamūlaṃ moho akusalamūlaṃ idaṃ vuccatāvuso akusalamūlaṃ. {111.2} Katamañcāvuso kusalaṃ . pāṇātipātā veramaṇī kusalaṃ adinnādānā veramaṇī kusalaṃ kāmesumicchācārā veramaṇī kusalaṃ musāvādā veramaṇī kusalaṃ pisuṇāya vācāya veramaṇī kusalaṃ pharusāya vācāya veramaṇī kusalaṃ samphappalāpā veramaṇī kusalaṃ anabhijjhā kusalaṃ abyāpādo kusalaṃ sammādiṭṭhi kusalaṃ idaṃ vuccatāvuso kusalaṃ. {111.3} Katamañcāvuso kusalamūlaṃ . alobho kusalamūlaṃ adoso kusalamūlaṃ amoho kusalamūlaṃ idaṃ vuccatāvuso kusalamūlaṃ . yato kho āvuso ariyasāvako evaṃ akusalaṃ pajānāti evaṃ akusalamūlaṃ pajānāti evaṃ kusalaṃ pajānāti evaṃ kusalamūlaṃ pajānāti so sabbaso rāgānusayaṃ pahāya paṭighānusayaṃ paṭivinodetvā asmīti diṭṭhimānānusayaṃ samūhanitvā avijjaṃ pahāya vijjaṃ uppādetvā diṭṭheva dhamme dukkhassantakaro hoti . ettāvatāpi kho āvuso ariyasāvako sammādiṭṭhī hoti ujugatāssa diṭṭhi dhamme Aveccappasādena samannāgato āgato imaṃ saddhammanti.