[170] Pañca kho imā sārīputta gatiyo katamā pañca nirayo tiracchānayoni pittivisayo manussā devā . nirayañcāhaṃ sārīputta pajānāmi nirayagāmiñca maggaṃ nirayagāminiñca paṭipadaṃ yathā paṭipanno ca kāyassa bhedā parammaraṇā apāyaṃ duggatiṃ vinipātaṃ nirayaṃ upapajjati tañca pajānāmi . tiracchānayoniñcāhaṃ sārīputta pajānāmi tiracchānayonigāmiñca maggaṃ tiracchānayonigāminiñca paṭipadaṃ yathā paṭipanno ca kāyassa bhedā parammaraṇā tiracchānayoniṃ upapajjati tañca pajānāmi . pittivisayañcāhaṃ sārīputta pajānāmi pittivisayagāmiñca maggaṃ pittivisayagāminiñca paṭipadaṃ yathā paṭipanno ca kāyassa bhedā parammaraṇā pittivisayaṃ upapajjati tañca pajānāmi . manusse cāhaṃ sārīputta pajānāmi manussalokagāmiñca Maggaṃ manussalokagāminiñca paṭipadaṃ yathā paṭipanno ca kāyassa bhedā parammaraṇā manussesu upapajjati tañca pajānāmi . deve cāhaṃ sārīputta pajānāmi devalokagāmiñca maggaṃ devalokagāminiñca paṭipadaṃ yathā paṭipanno ca kāyassa bhedā parammaraṇā sugatiṃ saggaṃ lokaṃ upapajjati tañca pajānāmi . nibbānañcāhaṃ sārīputta pajānāmi nibbānagāmiñca maggaṃ nibbānagāminiñca paṭipadaṃ yathā paṭipanno ca āsavānaṃ khayā anāsavaṃ cetovimuttiṃ paññāvimuttiṃ diṭṭheva dhamme sayaṃ abhiññā sacchikatvā upasampajja viharati tañca pajānāmi.
[171] Idhāhaṃ sārīputta ekaccaṃ puggalaṃ evaṃ cetasā ceto paricca jānāmi tathāyaṃ puggalo paṭipanno tathā ca iriyati tañca maggaṃ samārūḷho yathā kāyassa bhedā parammaraṇā apāyaṃ duggatiṃ vinipātaṃ nirayaṃ upapajjissatīti tamenaṃ passāmi aparena samayena dibbena cakkhunā visuddhena atikkantamānusakena kāyassa bhedā parammaraṇā apāyaṃ duggatiṃ vinipātaṃ nirayaṃ upapannaṃ ekantadukkhā tippā kaṭukā vedanā vediyamānaṃ. Seyyathāpi sārīputta aṅgārakāsu sādhikaporisā pūrā aṅgārānaṃ vītaccikānaṃ vītadhūmānaṃ atha puriso āgaccheyya ghammābhitatto ghammapareto kilanto tasito pipāsito ekāyanena maggena tameva aṅgārakāsuṃ paṇidhāya tamenaṃ cakkhumā puriso disvā evaṃ vadeyya tathāyaṃ bhavaṃ puriso paṭipanno tathā Ca iriyati tañca maggaṃ samārūḷho yathā imaṃyeva aṅgārakāsuṃ āgamissatīti tamenaṃ passeyya aparena samayena tassā aṅgārakāsuyā patitaṃ ekantadukkhā tippā kaṭukā vedanā vediyamānaṃ evameva kho ahaṃ sārīputta idhekaccaṃ puggalaṃ evaṃ cetasā ceto paricca jānāmi tathāyaṃ puggalo paṭipanno tathā ca iriyati tañca maggaṃ samārūḷho yathā kāyassa bhedā parammaraṇā apāyaṃ duggatiṃ vinipātaṃ nirayaṃ upapajjissatīti tamenaṃ passāmi aparena samayena dibbena cakkhunā visuddhena atikkantamānusakena kāyassa bhedā parammaraṇā apāyaṃ duggatiṃ vinipātaṃ nirayaṃ upapannaṃ ekantadukkhā tippā kaṭukā vedanā vediyamānaṃ.