[177] Abhijānāmi kho panāhaṃ sārīputta caturaṅgasamannāgataṃ Brahmacariyaṃ caritā . tapassissudaṃ homi paramatapassī lūkho sudaṃ homi paramalūkho jegucchī sudaṃ homi paramajegucchī pavivitto sudaṃ homi paramapavivitto.

[178] Tatrassu me idaṃ sārīputta tapassitāya hoti acelako homi muttācāro hatthāvalekhano na ehibhadantiko na tiṭṭhabhadantiko na abhihataṃ na uddissa kataṃ na nimantanaṃ sādiyāmi . so na kumbhimukhā paṭiggaṇhāmi na kaḷopimukhā paṭiggaṇhāmi na eḷakamantaraṃ na daṇḍamantaraṃ na mūsalamantaraṃ na dvinnaṃ bhuñjamānānaṃ na gabbhiniyā na pāyamānāya na purisantaragatāya na saṅkittīsu na yattha sā upaṭṭhito hoti na yattha makkhikā saṇḍasaṇḍacārinī na macchaṃ na maṃsaṃ na suraṃ na merayaṃ na thusodakaṃ pivāmi. {178.1} So ekāgāriko vā homi ekālopiko dvāgāriko vā homi dvālopiko .pe. sattāgāriko vā homi sattālopiko. Ekissāpi dattiyā yāpemi dvīhipi dattīhi yāpemi .pe. sattahipi dattīhi yāpemi ekāhikampi āhāraṃ āhāremi dvīhikampi āhāraṃ āhāremi .pe. sattāhikampi āhāraṃ āhāremi iti evarūpaṃ aḍḍhamāsikampi pariyāyabhattabhojanānuyogamanuyutto viharāmi . so sākabhakkho vā homi sāmākabhakkho vā homi nīvārabhakkho vā homi daddulabhakkho vā homi haṭabhakkho vā homi kaṇabhakkho Vā homi ācāmabhakkho vā homi piññākabhakkho vā homi tiṇabhakkho vā homi gomayabhakkho vā homi vanamūlaphalāhāro yāpemi pavattaphalabhojī. {178.2} So sāṇānipi dhāremi masāṇānipi dhāremi chavadussānipi dhāremi paṃsukulānipi dhāremi tirīṭānipi dhāremi ajinānipi dhāremi ajinakkhipampi dhāremi kusacīrampi dhāremi vākacīrampi dhāremi phalakacīrampi dhāremi kesakambalampi dhāremi vālakambalampi dhāremi uḷūkapakkhampi dhāremi kesamassulocakopi homi kesamassulocanānuyogamanuyutto ubbhaṭṭhako homi āsanapaṭikkhitto ukkuṭikopi homi ukkuṭikappadhānamanuyutto kaṇṭakāpassayikopi homi kaṇṭakāpassaye seyyaṃ kappemi sāyatatiyakampi udakorohanānuyogamanuyutto viharāmi iti evarūpaṃ anekavihitaṃ kāyassa ātāpanaparitāpanānuyogamanuyutto viharāmi. Idaṃsu me sārīputta tapassitāya hoti.