[189] Santi kho pana sārīputta eke samaṇabrāhmaṇā evaṃvādino evaṃdiṭṭhino āvāsena suddhīti . na kho paneso sārīputta āvāso sulabharūpo yo mayā anāvuṭṭhapubbo iminā dīghena addhunā aññatra suddhāvāsehi devehi suddhāvāse cāhaṃ sārīputta deve āvaseyyaṃ nayimaṃ lokaṃ puna āgaccheyyaṃ.

[190] Santi kho pana sārīputta eke samaṇabrāhmaṇā evaṃvādino evaṃdiṭṭhino yaññena suddhīti . na kho paneso sārīputta yañño sulabharūpo yo mayā ayiṭṭhapubbo iminā dīghena addhunā tañca kho raññā vā satā khattiyena muddhāvasittena brāhmaṇena vā mahāsālena.

[191] Santi kho pana sārīputta eke samaṇabrāhmaṇā evaṃvādino evaṃdiṭṭhino aggipāricariyāya suddhīti . na kho paneso sārīputta aggi sulabharūpo yo mayā apariciṇṇapubbo iminā dīghena addhunā tañca kho raññā vā satā khattiyena muddhāvasittena brāhmaṇena vā mahāsālena.

[192] Santi kho pana sārīputta eke samaṇabrāhmaṇā evaṃvādino evaṃdiṭṭhino yāvadevāyaṃ bhavaṃ puriso daharo hoti Yuvā susukāḷakeso bhadrena yobbanena samannāgato paṭhamena vayasā tāvadeva paramena paññāveyyattiyena samannāgato hoti yato ca kho ayaṃ bhavaṃ puriso jiṇṇo hoti vuḍḍho mahallako addhagato vayo anuppatto asītiko vā navutiko vā vassasatiko vā jātiyā atha tamhā paññāveyyattiyā parihāyatīti . na kho panetaṃ sārīputta evaṃ daṭṭhabbaṃ . ahaṃ kho pana sārīputta etarahi jiṇṇo vuḍḍho mahallako addhagato vayo anuppatto asītiko me vayo vattati. {192.1} Idhassu me sārīputta cattāro sāvakā vassasatāyukā vassasatajīvino paramāya satiyā ca gatiyā ca dhitiyā ca samannāgatā paramena ca paññāveyyattiyena seyyathāpi sārīputta daḷhadhammo dhanuggaho sikkhito katahattho katupāsano lahukena asanena appakasireneva tiriyaṃ tālacchāyaṃ atipāteyya evaṃ adhimattasatimanto evaṃ adhimattagatimanto evaṃ adhimattadhitimanto evaṃ paramena paññāveyyattiyena samannāgatā te maṃ catunnaṃ satipaṭṭhānānaṃ upādāyupādāya pañhaṃ puccheyyuṃ puṭṭho puṭṭho cāhaṃ tesaṃ byākareyyaṃ byākatañca me byākatato dhāreyyuṃ na ca maṃ dutiyakaṃ uttariṃ paṭipuccheyyuṃ aññatra asita pīta khāyita sāyitā aññatra uccārapassāvakammā aññatra niddākilamathapaṭivinodanā apariyādinnāyevassa sārīputta tathāgatassa dhammadesanā apariyādinnaṃyevassa tathāgatassa dhammapadabyañjanaṃ apariyādinnaṃyevassa tathāgatassa Pañhāpaṭibhānaṃ . atha me te cattāro sāvakā vassasatāyukā vassasatajīvino vassasatassa accayena kālaṃ kareyyuṃ . mañcakena cepi maṃ sārīputta pariharissatha nevatthi tathāgatassa paññāveyyattiyassa aññathattaṃ . yaṃ kho taṃ sārīputta sammā vadamāno vadeyya asammohadhammo satto loke uppanno bahujanahitāya bahujanasukhāya lokānukampāya atthāya hitāya sukhāya devamanussānanti . mameva taṃ sammā vadamāno vadeyya asammohadhammo satto loke uppanno bahujanahitāya bahujanasukhāya lokānukampāya atthāya hitāya sukhāya devamanussānanti.