[276] Evamme sutaṃ ekaṃ samayaṃ bhagavā kurūsu viharati kammāsadhammaṃ nāma kurūnaṃ nigamo bhāradvājagottassa brāhmaṇassa agyāgāre tiṇasantharake . atha kho bhagavā pubbaṇhasamayaṃ nivāsetvā pattacīvaramādāya kammāsadhammaṃ piṇḍāya pāvisi . kammāsadhamme piṇḍāya caritvā pacchābhattaṃ piṇḍapātapaṭikkanto yena aññataro vanasaṇḍo tenupasaṅkami divāvihārāya taṃ vanasaṇḍaṃ ajjhogāhetvā aññatarasmiṃ rukkhamūle divāvihāraṃ nisīdi.

[277] Atha kho māgaṇḍiyo paribbājako jaṅghāvihāraṃ anucaṅkamamāno anuvicaramāno yena bhāradvājagottassa brāhmaṇassa agyāgāraṃ tenupasaṅkami . addasā kho māgaṇḍiyo paribbājako bhāradvājagottassa brāhmaṇassa agyāgāre tiṇasantharakaṃ [3]- disvāna bhāradvājagottaṃ brāhmaṇaṃ etadavoca kassa navayaṃ samma bhoto bhāradvājassa agyāgāre tiṇasantharako paññatto samaṇaseyyānurūpaṃ maññeti . atthi bho māgaṇḍiya samaṇo gotamo sakyaputto sakyakulā pabbajito taṃ kho pana bhavantaṃ gotamaṃ evaṃkalyāṇo kittisaddo abbhuggato itipi so bhagavā arahaṃ sammāsambuddho vijjācaraṇasampanno sugato lokavidū anuttaro Purisadammasārathi satthā devamanussānaṃ buddho bhagavāti tassesā bhoto gotamassa seyyā paññattāti . duddiṭṭhaṃ vata bho bhāradvāja addasāma ye mayaṃ tassa bhoto gotamassa bhūnahanassa seyyaṃ addasāmāti. {277.1} Rakkhassetaṃ māgaṇḍiya vācaṃ rakkhassetaṃ māgaṇḍiya vācaṃ bahū hi tasseva bhoto gotamassa khattiyapaṇḍitāpi brāhmaṇapaṇḍitāpi gahapatipaṇḍitāpi samaṇapaṇḍitāpi abhippasannā vinītā ariye ñāye dhamme kusaleti . sammukhā cepi mayaṃ bhāradvāja taṃ bhavantaṃ gotamaṃ passeyyāma sammukhāpi naṃ vadeyyāma bhūnahano samaṇo gotamoti taṃ kissa hetu evañhi no sutte ocaratīti . sace taṃ bhoto māgaṇḍiyassa agaru ārocessāmi tassa samaṇassa gotamassāti . appossukko bhavaṃ bhāradvājo vutto ca naṃ vadeyyāti.