[559] Evamme sutaṃ ekaṃ samayaṃ bhagavā sakkesu viharati medaḷupaṃ nāma sakyānaṃ nigamo . tena kho pana samayena rājā pasenadi kosalo nagarakaṃ anuppatto hoti kenacideva karaṇīyena. Atha kho rājā pasenadi kosalo dīghaṃ kārāyanaṃ āmantesi yojehi samma kārāyana bhadrāni bhadrāni yānāni uyyānabhūmiyaṃ gacchāma subhūmiṃ dassanāyāti . evaṃ devāti kho dīgho kārāyano rañño pasenadissa kosalassa paṭissutvā bhadrāni bhadrāni yānāni yojāpetvā rañño pasenadissa kosalassa paṭivedesi yuttāni kho te deva bhadrāni bhadrāni yānāni yassadāni kālaṃ maññasīti.

[560] Atha kho rājā pasenadi kosalo bhadraṃ yānaṃ abhirūhitvā bhadrehi bhadrehi yānehi nagarakamhā niyyāsi mahaccarājānubhāvena yena ārāmo tena pāyāsi yāvatikā yānassa bhūmi yānena gantvā yānā paccorohitvā pattikova ārāmaṃ pāvisi . addasā kho rājā pasenadi kosalo ārāme jaṅghāvihāraṃ anucaṅkamamāno anuvicaramāno rukkhamūlāni pāsādikāni pāsādanīyāni appasaddāni appanigghosāni vijanavātāni manussarāhasseyyakāni paṭisallānasāruppāni disvāna bhagavantaṃyeva ārabbha pīti udapādi imāni kho tāni rukkhamūlāni pāsādikāni pāsādanīyāni appasaddāni Appanigghosāni vijanavātāni manussarāhasseyyakāni paṭisallānasāruppāni yattha sudaṃ mayantaṃ bhagavantaṃ payirupāsāma arahantaṃ sammāsambuddhanti. {560.1} Atha kho rājā pasenadi kosalo dīghaṃ kārāyanaṃ āmantesi imāni kho samma kārāyana tāni rukkhamūlāni pāsādikāni pāsādanīyāni appasaddāni appanigghosāni vijanavātāni manussarāhasseyyakāni paṭisallānasāruppāni yattha sudaṃ mayantaṃ bhagavantaṃ payirupāsāma arahantaṃ sammāsambuddhaṃ kahaṃ nu kho samma kārāyana etarahi so bhagavā viharati arahaṃ sammāsambuddhoti. {560.2} Atthi mahārāja medaḷupaṃ nāma sakyānaṃ nigamo tattha so bhagavā etarahi viharati arahaṃ sammāsambuddhoti . Kīvadūro pana samma kārāyana nagarakamhā medaḷupaṃ nāma sakyānaṃ nigamo hotīti . na dūre mahārāja tīṇi yojanāni sakkā divasāvasesena gantunti . Tenahi samma kārāyana yojehi bhadrāni bhadrāni yānāni gamissāma mayantaṃ bhagavantaṃ dassanāya arahantaṃ sammāsambuddhanti . evaṃ devāti kho dīgho kārāyano rañño pasenadissa kosalassa paṭissutvā bhadrāni bhadrāni yānāni yojāpetvā rañño pasenadissa kosalassa paṭivedesi yuttāni kho te deva bhadrāni bhadrāni yānāni yassadāni kālaṃ maññasīti.