[646] Evamme sutaṃ ekaṃ samayaṃ bhagavā kosalesu cārikañcaramāno mahatā bhikkhusaṅghena saddhiṃ yena opāsādaṃ nāma kosalānaṃ brāhmaṇagāmo tadavasari . tatra sudaṃ bhagavā opāsāde viharati uttarena opāsādaṃ devavane sālavane . tena kho pana samayena caṅkī brāhmaṇo opāsādaṃ ajjhāvasati sattussadaṃ satiṇakaṭṭhodakaṃ sadhaññaṃ rājabhoggaṃ raññā pasenadinā kosalena dinnaṃ rājadāyaṃ brahmadeyyaṃ.

[647] Assosuṃ kho opāsādakā brāhmaṇagahapatikā samaṇo khalu bho gotamo sakyaputto sakyakulā pabbajito kosalesu cārikañcaramāno mahatā bhikkhusaṅghena saddhiṃ opāsādaṃ anuppatto opāsāde viharati uttarena opāsādaṃ devavane sālavane taṃ kho pana bhavantaṃ gotamaṃ evaṃkalyāṇo kittisaddo abbhuggato itipi so bhagavā arahaṃ sammāsambuddho vijjācaraṇasampanno sugato lokavidū anuttaro purisadammasārathi satthā devamanussānaṃ buddho bhagavā so imaṃ lokaṃ sadevakaṃ samārakaṃ sabrahmakaṃ sassamaṇabrāhmaṇiṃ pajaṃ sadevamanussaṃ sayaṃ abhiññā sacchikatvā pavedeti so dhammaṃ deseti ādikalyāṇaṃ majjhekalyāṇaṃ pariyosānakalyāṇaṃ Sātthaṃ sabyañjanaṃ kevalaparipuṇṇaṃ parisuddhaṃ brahmacariyaṃ pakāseti sādhu kho pana tathārūpānaṃ arahataṃ dassanaṃ hotīti. Atha kho opāsādakā brāhmaṇagahapatikā opāsādā nikkhamitvā saṅghā saṅghīgaṇībhūtā uttarena mukhā gacchanti yena devavanaṃ sālavanaṃ . tena kho pana samayena caṅkī brāhmaṇo upari pāsāde divā seyyaṃ upagato hoti.

[648] Addasā kho caṅkī brāhmaṇo opāsādake brāhmaṇagahapatike opāsādā nikkhamitvā saṅghe saṅghīgaṇībhūte uttarena mukhe gacchante yena devavanaṃ sālavanaṃ disvāna khattaṃ āmantesi kinnu kho bho khatte opāsādakā brāhmaṇagahapatikā opāsādā nikkhamitvā saṅghā saṅghīgaṇībhūtā uttarena mukhā gacchanti yena devavanaṃ sālavananti . atthi bho caṅki samaṇo gotamo sakyaputto sakyakulā pabbajito kosalesu cārikañcaramāno mahatā bhikkhusaṅghena saddhiṃ opāsādaṃ anuppatto opāsāde viharati uttarena opāsādaṃ devavane sālavane taṃ kho pana bhavantaṃ gotamaṃ evaṃkalyāṇo kittisaddo abbhuggato itipi so bhagavā arahaṃ sammāsambuddho vijjācaraṇasampanno sugato lokavidū anuttaro purisadammasārathi satthā devamanussānaṃ buddho bhagavāti tamete bhavantaṃ gotamaṃ dassanāya upasaṅkamantīti . tenahi bho khatte yena opāsādakā brāhmaṇagahapatikā tenupasaṅkami upasaṅkamitvā Opāsāde brāhmaṇagahapatike evaṃ vadehi caṅkī bho brāhmaṇo evamāha āgamentu kira bhavanto caṅkīpi brāhmaṇo samaṇaṃ gotamaṃ dassanāya upasaṅkamatīti . evaṃ bhoti kho so khattā caṅkissa brāhmaṇassa paṭissutvā yena opāsādakā brāhmaṇagahapatikā tenupasaṅkami upasaṅkamitvā opāsādake brāhmaṇagahapatike etadavoca caṅkī bho brāhmaṇo evamāha āgamentu kira bhavanto caṅkīpi brāhmaṇo samaṇaṃ gotamaṃ dassanāya upasaṅkamissatīti.