[62] Evamme sutaṃ ekaṃ samayaṃ bhagavā nāḷandāyaṃ viharati pāvārikambavane . tena kho pana samayena nigantho nāṭaputto nāḷandāyaṃ paṭivasati mahatiyā niganthaparisāya saddhiṃ . atha kho dīghatapassī nigantho nāḷandāyaṃ piṇḍāya caritvā pacchābhattaṃ piṇḍapātapaṭikkanto yena pāvārikambavanaṃ yena bhagavā tenupasaṅkami upasaṅkamitvā bhagavatā saddhiṃ sammodi sammodanīyaṃ kathaṃ sārāṇīyaṃ vītisāretvā ekamantaṃ aṭṭhāsi . ekamantaṃ ṭhitaṃ kho dīghatapassiṃ niganthaṃ bhagavā etadavoca saṃvijjanti kho dīghatapassi āsanāni sace ākaṅkhasi nisīdāti . evaṃ vutte dīghatapassī nigantho aññataraṃ nīcaṃ āsanaṃ gahetvā ekamantaṃ nisīdi.

[63] Ekamantaṃ nisinnaṃ kho dīghatapassiṃ niganthaṃ bhagavā etadavoca kati pana tapassi nigantho nāṭaputto kammāni paññāpeti pāpassa kammassa kiriyāya pāpassa kammassa pavattiyāti . na kho āvuso gotama āciṇṇaṃ niganthassa nāṭaputtassa kammaṃ kammanti paññāpetuṃ daṇḍaṃ daṇḍanti kho āvuso gotama āciṇṇaṃ niganthassa nāṭaputtassa paññāpetunti. {63.1} Kati pana tapassi nigantho nāṭaputto daṇḍāni paññāpeti pāpassa kammassa kiriyāya pāpassa kammassa pavattiyāti . tīṇi āvuso gotama Nigantho nāṭaputto daṇḍāni paññāpeti pāpassa kammassa kiriyāya pāpassa kammassa pavattiyā seyyathīdaṃ kāyadaṇḍaṃ vacīdaṇḍaṃ manodaṇḍanti. {63.2} Kiṃ pana tapassi aññadeva kāyadaṇḍaṃ aññaṃ vacīdaṇḍaṃ aññaṃ manodaṇḍanti . aññadeva āvuso gotama kāyadaṇḍaṃ aññaṃ vacīdaṇḍaṃ aññaṃ manodaṇḍanti . imesaṃ pana tapassi tiṇṇaṃ daṇḍānaṃ evaṃ paṭivibhattānaṃ evaṃ paṭivisiṭṭhānaṃ katamaṃ daṇḍaṃ nigantho nāṭaputto mahāsāvajjataraṃ paññāpeti pāpassa kammassa kiriyāya pāpassa kammassa pavattiyā yadi vā kāyadaṇḍaṃ yadi vā vacīdaṇḍaṃ yadi vā manodaṇḍanti. {63.3} Imesaṃ kho āvuso gotama tiṇṇaṃ daṇḍānaṃ evaṃ paṭivibhattānaṃ evaṃ paṭivisiṭṭhānaṃ kāyadaṇḍaṃ nigantho nāṭaputto mahāsāvajjataraṃ paññāpeti pāpassa kammassa kiriyāya pāpassa kammassa pavattiyā no tathā vacīdaṇḍaṃ no tathā manodaṇḍanti . kāyadaṇḍanti tapassi vadesi . kāyadaṇḍanti āvuso gotama vadāmi . kāyadaṇḍanti tapassi vadesi . kāyadaṇḍanti āvuso gotama vadāmi . kāyadaṇḍanti tapassi vadesi . kāyadaṇḍanti āvuso gotama vadāmīti . Itiha bhagavā dīghatapassiṃ niganthaṃ imasmiṃ kathāvatthusmiṃ yāvatatiyakaṃ patiṭṭhāpesi.