[84] Evamme sutaṃ ekaṃ samayaṃ bhagavā koliyesu viharati haliddavasanaṃ nāma koliyānaṃ nigamo . atha kho puṇṇo ca koliyaputto govattiko acelo ca seniyo kukkuravattiko yena bhagavā tenupasaṅkamiṃsu upasaṅkamitvā puṇṇo koliyaputto govattiko bhagavantaṃ abhivādetvā ekamantaṃ nisīdi . acelo pana seniyo kukkuravattiko bhagavatā saddhiṃ sammodi sammodanīyaṃ kathaṃ sārāṇīyaṃ vītisāretvā kukkurova palikuṇṭhitvā ekamantaṃ nisīdi . ekamanataṃ nisinno kho puṇṇo koliyaputto govattiko bhagavantaṃ etadavoca ayaṃ bhante acelo seniyo kukkuravattiko dukkarakārako chamāyaṃ nikkhittaṃ bhojanaṃ bhuñjati tassa taṃ kukkuravattaṃ dīgharattaṃ samattaṃ samādinnaṃ tassa kā gati ko abhisamparāyoti . Alaṃ puṇṇa tiṭṭhatetaṃ mā maṃ etaṃ pucchīti. {84.1} Dutiyampikho puṇṇo koliyaputto govattiko bhagavantaṃ etadavoca ayaṃ bhante acelo seniyo kukkuravattiko dukkarakārako chamāyaṃ nikkhittaṃ bhojanaṃ bhuñjati tassa taṃ kukkuravattaṃ dīgharattaṃ samattaṃ samādinnaṃ tassa kā gati ko abhisamparāyoti . alaṃ puṇṇa tiṭṭhatetaṃ mā maṃ etaṃ pucchīti tatiyampi kho puṇṇo koliyaputto govattiko bhagavantaṃ etadavoca Ayaṃ bhante acelo seniyo kukkuravattiko dukkarakārako chamāyaṃ nikkhittaṃ bhojanaṃ bhuñjati tassa taṃ kukkuravattaṃ dīgharattaṃ samattaṃ samādinnaṃ tassa kā gati ko abhisamparāyoti.

[85] Addhā kho te ahaṃ puṇṇa na labhāmi alaṃ puṇṇa tiṭṭhatetaṃ mā maṃ etaṃ pucchīti apica te ahaṃ byākarissāmi idha puṇṇa ekacco kukkuravattaṃ bhāveti paripuṇṇaṃ abbokiṇṇaṃ kukkurasīlaṃ bhāveti paripuṇṇaṃ abbokiṇṇaṃ kukkuracittaṃ bhāveti paripuṇṇaṃ abbokiṇṇaṃ kukkurākappaṃ bhāveti paripuṇṇaṃ abbokiṇṇaṃ so kukkuravattaṃ bhāvetvā paripuṇṇaṃ abbokiṇṇaṃ kukkurasīlaṃ bhāvetvā paripuṇṇaṃ abbokiṇṇaṃ kukkuracittaṃ bhāvetvā paripuṇṇaṃ abbokiṇṇaṃ kukkurākappaṃ bhāvetvā paripuṇṇaṃ abbokiṇṇaṃ kāyassa bhedā parammaraṇā kukkurānaṃ sahabyataṃ upapajjati sace kho panassa evaṃ diṭṭhi hoti imināhaṃ sīlena vā vattena vā tapena vā brahmacariyena vā devo vā bhavissāmi devaññataro vāti sāssa hoti micchādiṭṭhi micchādiṭṭhissa kho ahaṃ puṇṇa dvinnaṃ gatīnaṃ aññataraṃ gatiṃ vadāmi nirayaṃ vā tiracchānayoniṃ vā iti kho puṇṇa sampajjamānaṃ kukkuravattaṃ kukkurānaṃ sahabyataṃ upaneti vipajjamānaṃ nirayanti . evaṃ vutte acelo seniyo kukkuravattiko parodi assūni pavattesi.