[278] Assosi kho bhagavā dibbāya sotadhātuyā visuddhāya atikkantamānusakāya bhāradvājagottassa brāhmaṇassa māgaṇḍiyena paribbājakena saddhiṃ imaṃ kathāsallāpaṃ . atha kho bhagavā sāyaṇhasamayaṃ paṭisallānā vuṭṭhito yena bhāradvājagottassa brāhmaṇassa agyāgāraṃ tenupasaṅkami upasaṅkamitvā nisīdi paññatte tiṇasantharake . Atha kho bhāradvājagotto brāhmaṇo yena bhagavā tenupasaṅkami upasaṅkamitvā bhagavatā saddhiṃ sammodi sammodanīyaṃ kathaṃ sārāṇīyaṃ Vītisāretvā ekamantaṃ nisīdi . ekamantaṃ nisinnaṃ kho bhāradvājagottaṃ brāhmaṇaṃ bhagavā etadavoca ahu pana te bhāradvāja māgaṇḍiyena paribbājakena saddhiṃ imaṃyeva tiṇasantharakaṃ ārabbha kocideva kathāsallāpoti . evaṃ vutte bhāradvājagotto brāhmaṇo saṃviggo lomahaṭṭhajāto bhagavantaṃ etadavoca etadeva kho pana mayaṃ bhoto gotamassa ārocetukāmā atha ca pana bhavaṃ gotamo anakkhātaṃyeva akkhāsīti . ayañca hidaṃ bhagavato bhāradvājagottena brāhmaṇena saddhiṃ antarākathā vippakatā hoti . atha kho māgaṇḍiyo paribbājako jaṅghāvihāraṃ anucaṅkamamāno anuvicaramāno yena bhāradvājagottassa brāhmaṇassa agyāgāraṃ yena bhagavā tenupasaṅkami upasaṅkamitvā bhagavatā saddhiṃ sammodi sammodanīyaṃ kathaṃ sārāṇīyaṃ vītisāretvā ekamantaṃ nisīdi.
[279] Ekamantaṃ nisinnaṃ kho māgaṇḍiyaṃ paribbājakaṃ bhagavā etadavoca cakkhu kho māgaṇḍiya rūpārāmaṃ rūparataṃ rūpasammuditaṃ taṃ tathāgatassa dantaṃ guttaṃ rakkhitaṃ saṃvutaṃ tassa ca saṃvarāya dhammaṃ deseti idannu te etaṃ māgaṇḍiya sandhāya bhāsitaṃ bhūnahano samaṇo gotamoti . etadeva pana me bho gotama sandhāya bhāsitaṃ bhūnahano samaṇo gotamoti taṃ kissa hetu evañhi no sutte ocaratīti . sotaṃ kho māgaṇḍiya saddārāmaṃ .pe. Ghānaṃ kho māgaṇḍiya gandhārāmaṃ ... jivhā kho māgaṇḍiya rasārāmā rasaratā rasasammuditā sā tathāgatassa dantā guttā rakkhitā saṃvutā tassa ca saṃvarāya dhammaṃ deseti idannu te etaṃ kho māgaṇḍiya sandhāya bhāsitaṃ bhūnahano samaṇo gotamoti . Etadeva kho pana me bho gotama sandhāya bhāsitaṃ bhūnahano samaṇo gotamoti taṃ kissa hetu evañhi no sutte ocaratīti. {279.1} Kāyo kho māgaṇḍiya phoṭṭhabbārāmo .pe. mano kho māgaṇḍiya dhammārāmo dhammarato dhammasammudito so tathāgatassa danto gutto rakkhito saṃvuto tassa ca saṃvarāya dhammaṃ deseti idannu te etaṃ māgaṇḍiya sandhāya bhāsitaṃ bhūnahano samaṇo gotamoti . Etadeva kho pana me bho gotama sandhāya bhāsitaṃ bhūnahano samaṇo gotamoti taṃ kissa hetu evañhi no sutte ocaratīti.