[318] Ekacce evamāhaṃsu ayampi kho samaṇo gotamo saṅghī ceva gaṇī ca gaṇācariyo ñāto yasassī titthakaro sādhusammato bahujanassa so ca kho sāvakānaṃ sakkato garukato mānito pūjito samaṇañca pana gotamaṃ sāvakā sakkatvā garukatvā upanissāya viharanti . bhūtapubbaṃ samaṇo gotamo anekasatāya parisāya dhammaṃ desesi . tatra aññataro samaṇassa gotamassa sāvako ukkāsi . tamenamaññataro sabrahmacārī jannukena ghaṭṭesi appasaddo āyasmā hotu mā āyasmā saddamakāsi satthā no bhagavā dhammaṃ desetīti . yasmiṃ samaye samaṇo gotamo anekasatāya parisāya dhammaṃ desesi neva tasmiṃ samaye samaṇassa gotamassa sāvakānaṃ khipitasaddo vā hoti ukkāsitasaddo vā tamenaṃ mahājanakāyo paccāsiṃsamānarūpo paccupaṭṭhito hoti yanno bhagavā dhammaṃ bhāsissati tanno sossāmāti. {318.1} Seyyathāpi nāma puriso cātummahāpathe khuddaṃ madhuṃ anelakaṃ pīḷeyya tamenaṃ mahājanakāyo paccāsiṃsamānarūpo paccupaṭṭhito assa evameva yasmiṃ samaye samaṇo gotamo anekasatāya parisāya dhammaṃ deseti neva tasmiṃ samaye samaṇassa gotamassa sāvakānaṃ khipitasaddo vā hoti ukkāsitasaddo vā tamenaṃ mahājanakāyo paccāsiṃsamānarūpo paccupaṭṭhito Hoti yanno bhagavā dhammaṃ bhāsissati tanno sossāmāti . Yepi samaṇassa gotamassa sāvakā sabrahmacārīhi sampayojetvā sikkhaṃ paccakkhāya hīnāyāvattanti tepi satthuno ceva vaṇṇavādino honti dhammassa ca vaṇṇavādino honti saṅghassa ca vaṇṇavādino honti attagarahinoyeva honti anaññagarahino mayamevamhā alakkhikā mayaṃ appapuññā ye mayaṃ evaṃ svākkhāte dhammavinaye pabbajitvā na sakkhimhā yāvajīvaṃ paripuṇṇaṃ parisuddhaṃ brahmacariyaṃ caritunti . te ārāmikabhūtā vā upāsakabhūtā vā pañcasu sikkhāpadesu samādāya vattanti . iti samaṇo gotamo sāvakānaṃ sakkato garukato mānito pūjito samaṇañca pana gotamaṃ sāvakā sakkatvā garukatvā upanissāya viharantīti . katī pana tvaṃ udāyi mayi dhamme samanupassasi yehi mama sāvakā sakkaronti garukaronti mānenti pūjenti sakkatvā garukatvā upanissāya viharantīti.