[348] Puna caparaṃ udāyi akkhātā mayā sāvakānaṃ paṭipadā yathāpaṭipannā me sāvakā imamhā kāyā aññaṃ kāyaṃ abhinimminanti rūpiṃ manomayaṃ sabbaṅgapaccaṅgaṃ ahīnindriyaṃ . seyyathāpi udāyi puriso muñjamhā īsikaṃ ubbāheyya tassa evamassa ayaṃ īsikā ayaṃ muñjo añño muñjo aññā īsikā muñjamhā tveva īsikā ubbāḷhāti seyyathāpi vā panudāyi puriso asiṃ kosiyā ubbāheyya tassa evamassa ayaṃ asi ayaṃ kosi añño asi aññā kosi kosiyā tveva asi ubbāḷhoti seyyathāpi vā panudāyi puriso ahiṃ karaṇḍā uddhareyya tassa evamassa ayaṃ ahi ayaṃ karaṇḍo añño ahi añño karaṇḍo karaṇḍā tveva ahi ubbhatoti evameva kho udāyi akkhātā mayā sāvakānaṃ paṭipadā yathāpaṭipannā me sāvakā imamhā kāyā aññaṃ kāyaṃ abhinimminanti rūpiṃ manomayaṃ sabbaṅgapaccaṅgaṃ ahīnindriyaṃ . Tatra ca pana me sāvakā bahū abhiññāvosānapāramippattā viharanti.
[349] Puna caparaṃ udāyi akkhātā mayā sāvakānaṃ paṭipadā yathāpaṭipannā me sāvakā anekavihitaṃ iddhividhaṃ paccanubhonti Ekopi hutvā bahudhā honti bahudhāpi hutvā eko honti āvibhāvaṃ tirobhāvaṃ tirokuḍḍaṃ tiropākāraṃ tiropabbataṃ asajjamānā gacchanti seyyathāpi ākāse . paṭhaviyāpi ummujjanimmujjaṃ karonti seyyathāpi udake . udakepi abhijjamāne gacchanti seyyathāpi paṭhaviyaṃ . ākāsepi pallaṅkena kamanti seyyathāpi pakkhī sakuṇā . Imepi candimasuriye evaṃmahiddhike evaṃmahānubhāve pāṇinā parimasanti parimajjanti yāva brahmalokāpi kāyena vasaṃ vattenti. {349.1} Seyyathāpi udāyi dakkho kumbhakāro vā kumbhakārantevāsī vā suparikammakatāya mattikāya yaṃyadeva bhājanavikatiṃ ākaṅkheyya tantadeva kareyya abhinipphādeyya seyyathā vā panudāyi dakkho dantakāro vā dantakārantevāsī vā suparikammakatasmiṃ dantasmiṃ yaṃyadeva dantavikatiṃ ākaṅkheyya tantadeva kareyya abhinipphādeyya seyyathā vā panudāyi dakkho suvaṇṇakāro vā suvaṇṇakārantevāsī vā suparikammakatasmiṃ suvaṇṇasmiṃ yaṃyadeva suvaṇṇavikatiṃ ākaṅkheyya tantadeva kareyya abhinipphādeyya evameva kho udāyi akkhātā mayā sāvakānaṃ paṭipadā yathāpaṭipannā me sāvakā anekavihitaṃ iddhividhaṃ paccanubhonti ekopi hutvā bahudhā honti bahudhāpi hutvā eko honti āvibhāvaṃ tirobhāvaṃ tirokuḍḍaṃ tiropākāraṃ tiropabbataṃ asajjamānā gacchanti seyyathāpi ākāse . paṭhaviyāpi ummujjanimmujjaṃ karonti seyyathāpi udake . udakepi abhijjamāne Gacchanti seyyathāpi paṭhaviyaṃ . ākāse pallaṅkena kamanti seyyathāpi pakkhī sakuṇā . imepi candimasuriye evaṃmahiddhike evaṃmahānubhāve pāṇinā parimasanti parimajjanti yāva brahmalokāpi kāyena vasaṃ vattenti . tatra ca pana me sāvakā bahū abhiññāvosānapāramippattā viharanti.