[354] Puna caparaṃ udāyi akkhātā mayā sāvakānaṃ paṭipadā yathāpaṭipannā me sāvakā āsavānaṃ khayā anāsavaṃ cetovimuttiṃ paññāvimuttiṃ diṭṭheva dhamme sayaṃ abhiññā sacchikatvā upasampajja viharanti . seyyathāpi udāyi pabbatasaṅkhepe udakarahado accho vippasanno anāvilo tatra cakkhumā puriso tīre ṭhito passeyya sippikasambukampi sakkharakaṭhalampi macchagumbampi carantampi tiṭṭhantampi tassa evamassa ayaṃ kho udakarahado accho vippasanno anāvilo tatrime sippikasambukāpi sakkharakaṭhalāpi macchagumbāpi carantipi tiṭṭhantipīti evameva kho udāyi akkhātā mayā sāvakānaṃ paṭipadā Yathāpaṭipannā me sāvakā āsavānaṃ khayā anāsavaṃ cetovimuttiṃ paññāvimuttiṃ diṭṭheva dhamme sayaṃ abhiññā sacchikatvā upasampajja viharanti . tatra ca pana me sāvakā bahū abhiññāvosānapāramippattā viharanti.
[355] Ayaṃ kho udāyi pañcamo dhammo yena mama sāvakā sakkaronti garukaronti mānenti pūjenti sakkatvā garukatvā upanissāya viharanti . ime kho udāyi pañca dhammā yehi mama sāvakā sakkaronti garukaronti mānenti pūjenti sakkatvā garukatvā upanissāya viharantīti. Idamavoca bhagavā attamano sakuludāyi paribbājako bhagavato bhāsitaṃ abhinandīti. Mahāsakuludāyisuttaṃ niṭṭhitaṃ sattamaṃ. ----------