[367] Evamme sutaṃ ekaṃ samayaṃ bhagavā rājagahe viharati veḷuvane kalandakanivāpe . tena kho pana samayena sakuludāyi paribbājako moranivāpe paribbājakārāme paṭivasati mahatiyā paribbājakaparisāya saddhiṃ . atha kho bhagavā pubbaṇhasamayaṃ nivāsetvā pattacīvaramādāya yena rājagahaṃ tena piṇḍāya pāvisi . atha kho bhagavato etadahosi atippago kho tāva rājagahe piṇḍāya carituṃ yannūnāhaṃ yena moranivāpo paribbājakārāmo yena sakuludāyi paribbājako tenupasaṅkameyyanti . atha kho bhagavā yena moranivāpo paribbājakārāmo tenupasaṅkami.

[368] Tena kho pana samayena sakuludāyi paribbājako mahatiyā paribbājakaparisāya saddhiṃ nisinno hoti unnādiniyā uccāsaddamahāsaddāya anekavihitaṃ tiracchānakathaṃ kathentiyā seyyathīdaṃ rājakathaṃ .pe. itibhavābhavakathaṃ iti vā . addasā kho sakuludāyi paribbājako bhagavantaṃ dūratova āgacchantaṃ disvāna sakaṃ parisaṃ saṇṭhapesi appasaddā bhonto hontu mā bhonto saddamakattha ayaṃ samaṇo gotamo āgacchati appasaddakāmo kho pana so āyasmā appasaddassa vaṇṇavādī appevanāma appasaddaṃ parisaṃ viditvā upasaṅkamitabbaṃ maññeyyāti . atha kho te paribbājakā tuṇhī Ahesuṃ. {368.1} Atha kho bhagavā yena sakuludāyi paribbājako tenupasaṅkami . atha kho sakuludāyi paribbājako bhagavantaṃ etadavoca etu kho bhante bhagavā svāgataṃ bhante bhagavato cirassaṃ kho bhante bhagavā imaṃ pariyāyamakāsi yadidaṃ idhāgamanāya nisīdatu bhante bhagavā idamāsanaṃ paññattanti . nisīdi bhagavā paññatte āsane . Sakuludāyipi kho paribbājako aññataraṃ nīcaṃ āsanaṃ gahetvā ekamantaṃ nisīdi . ekamantaṃ nisinnaṃ kho sakuludāyiṃ paribbājakaṃ bhagavā etadavoca kāya nuttha udāyi etarahi kathāya sannisinnā kā ca pana vo antarākathā vippakatāti.

[369] Tiṭṭhatesā bhante kathā yāya mayaṃ etarahi kathāya sannisinnā nesā bhante kathā bhagavato dullabhā bhavissati pacchāpi savanāya yadāhaṃ bhante imaṃ parisaṃ anupasaṅkanto homi athāyaṃ parisā anekavihitaṃ tiracchānakathaṃ kathentī nisinnā hoti yadā ca kho ahaṃ bhante imaṃ parisaṃ upasaṅkanto homi athāyaṃ parisā mamaṃyeva mukhaṃ olokentī nisinnā hoti yanno samaṇo gotamo udāyi dhammaṃ bhāsissati tanno sossāmāti . Yadā pana bhante bhagavā imaṃ parisaṃ upasaṅkanto hoti atha ca ahañceva ayañca parisā bhagavato mukhaṃ olokentī nisinnā hoti yanno bhagavā dhammaṃ bhāsissati tanno sossāmāti . tenahi udāyi taññevettha paṭibhātu yathā maṃ paṭibhāseyyāti.