[389] Evamme sutaṃ ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme . atha kho vekhaṇaso paribbājako yena bhagavā tenupasaṅkami upasaṅkamitvā bhagavatā saddhiṃ sammodi sammodanīyaṃ kathaṃ sārāṇīyaṃ vītisāretvā ekamantaṃ aṭṭhāsi.

[390] Ekamantaṃ ṭhito kho vekhaṇaso paribbājako bhagavato santike udānaṃ udānesi ayaṃ paramo vaṇṇo ayaṃ paramo vaṇṇoti . Kiṃ pana tvaṃ kaccāna evaṃ vadesi ayaṃ paramo vaṇṇo ayaṃ paramo vaṇṇoti katamo [3]- paramo vaṇṇoti . yasmā bho gotama vaṇṇā añño vaṇṇo uttaritaro vā paṇītataro vā natthi so paramo vaṇṇoti . katamo so kaccāna vaṇṇo yasmā vaṇṇā añño vaṇṇo uttaritaro vā paṇītataro vā natthīti . yasmā bho gotama vaṇṇā añño vaṇṇo uttaritaro vā paṇītataro vā natthi so paramo vaṇṇoti.

[391] Dīghāpi kho te esā kaccāna phareyya yasmā bho gotama vaṇṇā añño vaṇṇo uttaritaro vā paṇītataro vā natthi so paramo vaṇṇoti vadesi tañca vaṇṇaṃ na paññāpesi . Seyyathāpi kaccāna puriso evaṃ vadeyya ahaṃ yā imasmiṃ Janapade janapadakalyāṇī taṃ icchāmi taṃ kāmemīti . tamenaṃ evaṃ vadeyyuṃ ambho purisa yaṃ tvaṃ janapadakalyāṇiṃ icchasi kāmesi jānāsi taṃ janapadakalyāṇiṃ khattiyiṃ vā brāhmaṇiṃ vā vessiṃ vā suddiṃ vāti . iti puṭṭho noti vadeyya . tamenaṃ evaṃ vadeyyuṃ ambho purisa yaṃ tvaṃ janapadakalyāṇiṃ icchasi kāmesi jānāsi taṃ janapadakalyāṇiṃ evaṃvaṇṇā evaṃgottā iti vāti .pe. dīghā vā rassā vā majjhimā vā kāḷī vā sāmā vā maṅguracchavī vāti amukasmiṃ nāma gāme vā nigame vā nagare vāti . iti puṭṭho noti vadeyya . tamenaṃ evaṃ vadeyyuṃ ambho purisa yaṃ tvaṃ na jānāsi na passasi taṃ tvaṃ icchasi kāmesīti. Iti puṭṭho āmāti vadeyya. {391.1} Taṃ kiṃ maññasi kaccāna nanu evaṃ sante tassa purisassa appāṭihirīkataṃ bhāsitaṃ sampajjatīti . addhā kho bho gotama evaṃ sante tassa purisassa appāṭihirīkataṃ bhāsitaṃ sampajjatīti . evameva kho tvaṃ kaccāna yasmā bho gotama vaṇṇā añño vaṇṇo uttaritaro vā paṇītataro vā natthi so paramo vaṇṇoti vadesi tañca vaṇṇaṃ na paññāpesīti . seyyathāpi bho gotama maṇi veḷuriyo subho jotimā aṭṭhaṃso suparikammakato paṇḍukambale nikkhitto bhāsateva tapateva virocateva evaṃvaṇṇo attā hoti arogo parammaraṇāti.