[396] Taṃ kiṃ maññasi kaccāna yā vā rattiyā paccūsasamayaṃ viddhe vigatavalāhake deve osadhitārakā yo vā tadahuposathe paṇṇarase viddhe vigatavalāhake deve abhido aḍḍharattasamayaṃ cando imesaṃ ubhinnaṃ vaṇṇānaṃ katamo vaṇṇo abhikkantataro ca paṇītataro cāti . yvāyaṃ bho gotama tadahuposathe paṇṇarase viddhe vigatavalāhake deve abhido aḍḍharattasamayaṃ cando ayaṃ imesaṃ ubhinnaṃ vaṇṇānaṃ abhikkantataro ca paṇītataro cāti.

[397] Taṃ kiṃ maññasi kaccāna yo vā tadahuposathe paṇṇarase viddhe vigatavalāhake deve abhido aḍḍharattasamayaṃ cando yo vā vassānaṃ pacchime māse saradasamaye viddhe vigatavalāhake deve abhido majjhantikasamayaṃ suriyo imesaṃ ubhinnaṃ vaṇṇānaṃ katamo vaṇṇo abhikkantataro ca paṇītataro cāti . Yvāyaṃ bho gotama vassānaṃ pacchime māse saradasamaye viddhe vigatavalāhake deve abhido majjhantikasamayaṃ suriyo ayaṃ imesaṃ ubhinnaṃ vaṇṇānaṃ abhikkantataro ca paṇītataro cāti.

[398] Tato kho te kaccāna bahū hi bahutarā devā ye imesaṃ candimasuriyānaṃ ābhā nānubhonti tyāhaṃ pajānāmi atha ca panāhaṃ na vadāmi yasmā vaṇṇā añño vaṇṇo uttaritaro Vā paṇītataro vā natthīti atha ca pana tvaṃ kaccāna yvāyaṃ vaṇṇo kiminā khajjopanakena nihīnataro ca kiliṭṭhataro ca so paramo vaṇṇoti vadesi tañca vaṇṇaṃ na paññāpesi . Pañca kho ime kaccāna kāmaguṇā katame pañca cakkhuviññeyyā rūpā iṭṭhā kantā manāpā piyarūpā kāmūpasañhitā rajanīyā sotaviññeyyā saddā ... ghānaviññeyyā gandhā ... Jivhāviññeyyā rasā ... kāyaviññeyyā phoṭṭhabbā iṭṭhā kantā manāpā piyarūpā kāmūpasañhitā rajanīyā ime kho kiccāna pañca kāmaguṇā . yaṃ kho kaccāna ime pañca kāmaguṇe paṭicca uppajjati sukhaṃ somanassaṃ idaṃ vuccati kāmasukhaṃ . iti kāmehi kāmasukhaṃ kāmasukhā kāmaggasukhaṃ tattha aggamakkhāyatīti.

[399] Evaṃ vutte vekhaṇaso paribbājako bhagavantaṃ etadavoca acchariyaṃ bho gotama abbhūtaṃ bho gotama yāva subhāsitañcidaṃ bhotā gotamena kāmehi kāmasukhaṃ kāmasukhā kāmaggasukhaṃ tattha aggamakkhāyatīti . dujjānaṃ kho etaṃ kaccāna tayā aññadiṭṭhikena aññakkhantikena aññarucikena aññatthayogena aññathācariyakena kāmaṃ vā kāmasukhaṃ vā kāmaggasukhaṃ vāti ye kho te kaccāna bhikkhū arahanto khīṇāsavā vusitavanto katakaraṇīyā ohitabhārā anuppattasadatthā parikkhīṇabhavasaññojanā sammadaññā vimuttā te Kho etaṃ jāneyyuṃ kāmaṃ vā kāmasukhaṃ vā kāmaggasukhaṃ vāti.