[400] Evaṃ vutte vekhaṇaso paribbājako kupito anattamano bhagavantaṃyeva khuṃsento bhagavantaṃyeva vambhento bhagavantaṃyeva vadamāno samaṇo [1]- gotamo pāpito bhavissatīti bhagavantaṃ etadavoca evameva panidhekacce samaṇabrāhmaṇā ajānantā pubbantaṃ ajānantā aparantaṃ atha ca pana khīṇā jāti vusitaṃ brahmacariyaṃ kataṃ karaṇīyaṃ nāparaṃ itthattāyāti pajānāmāti paṭijānanti tesamidaṃ bhāsitaṃ hassakaṃyeva sampajjati lāmakaṃyeva sampajjati rittakaṃyeva sampajjati tucchakaṃyeva sampajjatīti.

[401] Ye kho te kaccāna samaṇabrāhmaṇā ajānantā pubbantaṃ ajānantā aparantaṃ khīṇā jāti vusitaṃ brahmacariyaṃ kataṃ karaṇīyaṃ nāparaṃ itthattāyāti pajānāmāti paṭijānanti tesaṃ soyeva sahadhammiko niggaho hoti apica kaccāna tiṭṭhatu pubbanto tiṭṭhatu aparanto etu viññū puriso asaṭho amāyāvī ujujātiko ahamanusāsāmi ahaṃ dhammaṃ desemi yathānusiṭṭhaṃ tathā paṭipajjamāno nacirasseva sāmaññeva ñassati sāmaṃ dakkhiti evaṃ kirāyasmā bandhanā vippamokkho hoti yadidaṃ avijjābandhanā . seyyathāpi kaccāna daharo kumāro mando uttānaseyyako kaṇṭhapañcamehi bandhanehi bandho assa suttabandhanehi tassa vuḍḍhimanvāya indriyānaṃ Paripākamanvāya tāni bandhanāni muñceyyuṃ so mokkhomhīti kho jāneyya no ca bandhanaṃ evameva kho kaccāna etu viññū puriso asaṭho amāyāvī ujujātiko ahamanusāsāmi ahaṃ dhammaṃ desemi yathānusiṭṭhaṃ tathā paṭipajjamāno nacirasseva sāmaññeva ñassati sāmaṃ dakkhiti evaṃ kirāyasmā bandhanā vippamokkho hoti yadidaṃ avijjābandhanāti.

[402] Evaṃ vutte vekhaṇaso paribbājako bhagavantaṃ etadavoca abhikkantaṃ bho gotama abhikkantaṃ bho gotama .pe. upāsakaṃ maṃ bhavaṃ gotamo dhāretu ajjatagge pāṇupetaṃ saraṇaṅgatanti. Vekhaṇasasuttaṃ niṭṭhitaṃ dasamaṃ. Paribbājakavaggo tatiyo. ------------ Tassa vaggassa uddānaṃ puṇḍarī aggi sahakathināmo dīghanakho puna bhaṇḍaragotto sandakudāyi muṇḍikaputto maṇiko tathā kaccāno varavaggo. -------------