[403] Evamme sutaṃ ekaṃ samayaṃ bhagavā kosalesu cārikaṃ carati mahatā bhikkhusaṅghena saddhiṃ . atha kho bhagavā maggā okkamma aññatarasmiṃ padese sitaṃ pātvākāsi . atha kho āyasmato ānandassa etadahosi ko nu kho hetu ko paccayo bhagavato sitassa pātukammāya na akāraṇena tathāgatā sitaṃ pātukarontīti . atha kho āyasmā ānando ekaṃsaṃ uttarāsaṅgaṃ karitvā yena bhagavā tenañjalimpaṇāmetvā bhagavantaṃ etadavoca ko nu kho bhante hetu ko paccayo bhagavato sitassa pātukammāya na akāraṇena tathāgatā sitaṃ pātukarontīti.

[404] Bhūtapubbaṃ ānanda imasmiṃ padese vebhaḷigaṃ nāma nigamo ahosi iddho ceva phīto ca bahujano ākiṇṇamanusso . Vebhaḷigaṃ kho ānanda nigamaṃ kassapo bhagavā arahaṃ sammāsambuddho upanissāya vihāsi . idha sudaṃ ānanda kassapassa bhagavato arahato sammāsambuddhassa ārāmo ahosi . idha sudaṃ ānanda kassapo bhagavā arahaṃ sammāsambuddho nisinno bhikkhusaṅghaṃ ovadatīti.

[405] Atha kho āyasmā ānando catuguṇaṃ saṅghāṭiṃ paññāpetvā bhagavantaṃ etadavoca tenahi bhante bhagavā nisīdatu evāyaṃ bhūmippadeso dvīhi arahantehi sammāsambuddhehi paribhutto bhavissatīti . nisīdi bhagavā paññatte āsane . nisajja kho bhagavā āyasmantaṃ ānandaṃ āmantesi bhūtapubbaṃ ānanda imasmiṃ padese vebhaḷigaṃ nāma nigamo ahosi iddho ceva phīto ca bahujano ākiṇṇamanusso . vebhaḷigaṃ kho ānanda nigamaṃ kassapo bhagavā arahaṃ sammāsambuddho upanissāya vihāsi . idha sudaṃ ānanda kassapassa bhagavato arahato sammāsambuddhassa ārāmo ahosi . Idha sudaṃ ānanda kassapo bhagavā arahaṃ sammāsambuddho nisinno bhikkhusaṅghaṃ ovadati. {405.1} Vebhaḷige kho ānanda nigame ghaṭikāro nāma kumbhakāro kassapassa bhagavato arahato sammāsambuddhassa upaṭṭhāko ahosi aggupaṭṭhāko . ghaṭikārassa kho ānanda kumbhakārassa jotipālo nāma māṇavo sahāyo ahosi piyasahāyo . atha kho ānanda ghaṭikāro kumbhakāro jotipālaṃ māṇavaṃ ānantesi āyāma samma jotipāla kassapaṃ bhagavantaṃ arahantaṃ sammāsambuddhaṃ dassanāya upasaṅkamissāma sādhusammatañhi me tassa bhagavato dassanaṃ arahato sammāsambuddhassāti.