[415] Ekamantaṃ nisinnaṃ kho ānanda kikiṃ kāsirājānaṃ kassapo bhagavā arahaṃ sammāsambuddho dhammiyā kathāya sandassesi samādapesi samuttejesi sampahaṃsesi . atha kho ānanda kiki kāsirājā Kassapena bhagavatā arahatā sammāsambuddhena dhammiyā kathāya sandassito samādapito samuttejito sampahaṃsito kassapaṃ bhagavantaṃ arahantaṃ sammāsambuddhaṃ etadavoca adhivāsetu me bhante bhagavā svātanāya bhattaṃ saddhiṃ bhikkhusaṅghenāti . adhivāsesi kho ānanda kassapo bhagavā arahaṃ sammāsambuddho tuṇhībhāvena . atha kho ānanda kiki kāsirājā kassapassa bhagavato arahato sammāsambuddhassa adhivāsanaṃ viditvā uṭṭhāyāsanā kassapaṃ bhagavantaṃ arahantaṃ sammāsambuddhaṃ abhivādetvā padakkhiṇaṃ katvā pakkāmi . Atha kho ānanda kiki kāsirājā tassā rattiyā accayena sake nivesane paṇītaṃ khādanīyaṃ bhojanīyaṃ paṭiyādāpetvā paṇḍumudikassa sālino vicitakāḷakaṃ anekasūpaṃ anekabyañjanaṃ kassapassa bhagavato arahato sammāsambuddhassa kālaṃ ārocāpesi kālo bhante niṭṭhitaṃ bhattanti.
[416] Atha kho ānanda kassapo bhagavā arahaṃ sammāsambuddho pubbaṇhasamayaṃ nivāsetvā pattacīvaramādāya yena kikissa kāsirañño nivesanaṃ tenupasaṅkami upasaṅkamitvā paññatte āsane nisīdi saddhiṃ bhikkhusaṅghena . atha kho ānanda kiki kāsirājā buddhappamukhaṃ bhikkhusaṅghaṃ paṇītena khādanīyena bhojanīyena sahatthā santappesi sampavāresi . atha kho ānanda kiki kāsirājā kassapaṃ Bhagavantaṃ arahantaṃ sammāsambuddhaṃ bhuttāviṃ onītapattapāṇiṃ aññataraṃ nīcaṃ āsanaṃ gahetvā ekamantaṃ nisīdi . ekamantaṃ nisinno kho ānanda kiki kāsirājā kassapaṃ bhagavantaṃ arahantaṃ sammāsambuddhaṃ etadavoca adhivāsetu me bhante bhagavā bārāṇasiyaṃ vassāvāsaṃ evarūpaṃ saṅghassa upaṭṭhānaṃ bhavissatīti . alaṃ mahārāja adhivuṭṭho me vassāvāsoti . dutiyampi kho ānanda .pe. tatiyampi kho ānanda kiki kāsirājā kassapaṃ bhagavantaṃ arahantaṃ sammāsambuddhaṃ etadavoca adhivāsetu me bhagavā bārāṇasiyaṃ vassāvāsaṃ evarūpaṃ saṅghassa upaṭṭhānaṃ bhavissatīti . alaṃ mahārāja adhivuṭṭho me vassāvāsoti . atha kho ānanda kikissa kāsirañño na me kassapo bhagavā arahaṃ sammāsambuddho adhivāsesi bārāṇasiyaṃ vassāvāsanti ahudeva aññathattaṃ ahu domanassaṃ . atha kho ānanda kiki kāsirājā kassapaṃ bhagavantaṃ arahantaṃ sammāsambuddhaṃ etadavoca atthi nu kho bhante añño koci mayā upaṭṭhākataroti.