[435] Tatra sudaṃ āyasmā raṭṭhapālo thullakoṭṭhite viharati rañño korabyassa migācīre . atha kho āyasmā raṭṭhapālo pubbaṇhasamayaṃ nivāsetvā pattacīvaramādāya thullakoṭṭhitaṃ piṇḍāya pāvisi . thullakoṭṭhite sapadānaṃ piṇḍāya caramāno yena sakapitu Nivesanaṃ tenupasaṅkami . tena kho pana samayena āyasmato raṭṭhapālassa pitā majjhimāya dvārasālāya ullikkhāpeti . Addasā kho āyasmato raṭṭhapālassa pitā āyasmantaṃ raṭṭhapālaṃ dūratova āgacchantaṃ disvāna etadavoca imehi muṇḍakehi samaṇakehi amhākaṃ ekaputtako piyo manāpo pabbājitoti . atha kho āyasmā raṭṭhapālo sakapitu nivesane neva dānaṃ alattha na paccakkhānaṃ aññadatthuṃ akkosameva alattha.
[436] Tena kho pana samayena āyasmato raṭṭhapālassa ñātidāsī ābhidosikaṃ kummāsaṃ chaḍḍetukāmā hoti . atha kho āyasmā raṭṭhapālo taṃ ñātidāsiṃ etadavoca sace taṃ bhagini chaḍḍanīyadhammaṃ idha me patte ākīrāti . atha kho āyasmato raṭṭhapālassa ñātidāsī taṃ ābhidosikaṃ kummāsaṃ āyasmato raṭṭhapālassa patte ākīrantī hatthānañca pādānañca sarassa ca nimittaṃ aggahesi . atha kho āyasmato raṭṭhapālassa ñātidāsī yenāyasmato raṭṭhapālassa mātā tenupasaṅkami upasaṅkamitvā āyasmato raṭṭhapālassa mātaraṃ etadavoca yagghayye jāneyyāsi ayyaputto raṭṭhapālo anuppattoti . sace je saccaṃ bhaṇasi adāsiṃ taṃ karomīti . atha kho āyasmato raṭṭhapālassa mātā yenāyasmato raṭṭhapālassa pitā tenupasaṅkami upasaṅkamitvā Āyasmato raṭṭhapālassa pitaraṃ etadavoca yagghe gahapati jāneyyāsi raṭṭhapālo kira kulaputto anuppattoti.
[437] Tena kho pana samayena āyasmā raṭṭhapālo taṃ ābhidosikaṃ kummāsaṃ aññataraṃ kuḍḍaṃ nissāya paribhuñjati . atha kho āyasmato raṭṭhapālassa pitā yenāyasmā raṭṭhapālo tenupasaṅkami upasaṅkamitvā āyasmantaṃ raṭṭhapālaṃ etadavoca atthi nāma tāta raṭṭhapāla ābhidosikaṃ kummāsaṃ paribhuñjissasi nanu tāta raṭṭhapāla sakaṃ gehaṃ gantabbanti . kuto no gahapati amhākaṃ gehaṃ agārasmā anagāriyaṃ pabbajitānaṃ anagārā mayaṃ gahapati agamamhā kho te gahapati gehaṃ tattha neva dānaṃ alatthamhā na paccakkhānaṃ aññadatthuṃ akkosameva alatthamhāti . ehi tāta raṭṭhapāla gharaṃ gamissāmāti . alaṃ gahapati kataṃ me ajja bhattakiccanti. Tenahi tāta raṭṭhapāla adhivāsehi svātanāya bhattanti . adhivāsesi kho āyasmā raṭṭhapālo tuṇhībhāvena.