[446] Atthi kho mahārāja tena bhagavatā jānatā passatā Arahatā sammāsambuddhena cattāro dhammuddesā uddiṭṭhā yamahaṃ ñatvā ca disvā ca sutvā ca agārasmā anagāriyaṃ pabbajito . Katame cattāro . upanīyati loko addhuvoti kho mahārāja tena bhagavatā jānatā passatā arahatā sammāsambuddhena paṭhamo dhammuddeso uddiṭṭho yamahaṃ ñatvā ca disvā ca sutvā ca agārasmā anagāriyaṃ pabbajito atāṇo loko anabhissaroti kho mahārāja tena bhagavatā jānatā passatā arahatā sammāsambuddhena dutiyo dhammuddeso uddiṭṭho yamahaṃ ñatvā ca disvā ca sutvā ca agārasmā anagāriyaṃ pabbajito assako loko sabbaṃ pahāya gamanīyanti kho mahārāja tena bhagavatā jānatā passatā arahatā sammāsambuddhena tatiyo dhammuddeso uddiṭṭho yamahaṃ ñatvā ca disvā ca sutvā ca agārasmā anagāriyaṃ pabbajito ūno loko atitto taṇhādāsoti kho mahārāja tena bhagavatā jānatā passatā arahatā sammāsambuddhena catuttho dhammuddeso uddiṭṭho yamahaṃ ñatvā ca disvā ca sutvā ca agārasmā anagāriyaṃ pabbajito. {446.1} Ime kho mahārāja tena bhagavatā jānatā passatā arahatā sammāsambuddhena cattāro dhammuddesā uddiṭṭhā yamahaṃ ñatvā ca disvā ca sutvā ca agārasmā anagāriyaṃ pabbajitoti.
[447] Upanīyati loko addhuvoti bhavaṃ raṭṭhapālo āha Imassa pana bho raṭṭhapāla bhāsitassa kathaṃ attho daṭṭhabboti . Taṃ kiṃ maññasi mahārāja ahosi tvaṃ vīsativassuddesikopi paṇṇavīsativassuddesikopi hatthismiṃpi katāvī assasmiṃpi katāvī rathasmiṃpi katāvī dhanusmiṃpi katāvī tharusmiṃpi katāvī ūrubalī bāhubalī alamatto saṅgāmāvacaroti . ahosimahaṃ bho raṭṭhapāla vīsativassuddesikopi paṇṇavīsativassuddesikopi hatthismiṃpi katāvī assasmiṃpi katāvī rathasmiṃpi katāvī dhanusmiṃpi katāvī tharusmiṃpi katāvī ūrubalī bāhubalī alamatto saṅgāmāvacaro appekadāhaṃ bho raṭṭhapāla iddhimā maññe na attano balena samasamaṃ samanupassāmīti . {447.1} Taṃ kiṃ maññasi mahārāja evameva tvaṃ etarahipi ūrubalī bāhubalī alamatto saṅgāmāvacaroti . no hidaṃ bho raṭṭhapāla etarahi jiṇṇo vuḍḍho mahallako addhagato vayoanuppatto asītiko me vayo vattati appekadāhaṃ bho raṭṭhapāla idha pādaṃ karissāmīti aññeneva pādaṃ karomīti . idaṃ kho taṃ mahārāja tena bhagavatā jānatā passatā arahatā sammāsambuddhena sandhāya bhāsitaṃ upanīyati loko addhuvoti yamahaṃ ñatvā ca disvā ca sutvā ca agārasmā anagāriyaṃ pabbajitoti . acchariyaṃ bho raṭṭhapāla abbhūtaṃ bho raṭṭhapāla yāva subhāsitañcidaṃ tena bhagavatā jānatā passatā arahatā sammāsambuddhena upanīyati loko addhuvoti upanīyati Hi bho raṭṭhapāla loko addhuvo saṃvijjante kho bho raṭṭhapāla imasmiṃ rājakule hatthikāyāpi assakāyāpi rathakāyāpi pattikāyāpi ye amhākaṃ āpadāsu pariyodāya vattissanti.