[450] Ūno loko atitto taṇhādāsoti bhavaṃ raṭṭhapālo āha imassa pana bho raṭṭhapāla bhāsitassa kathaṃ attho daṭṭhabboti . Taṃ kiṃ maññasi mahārāja phītaṃ kuruṃ ajjhāvasasīti . evaṃ bho raṭṭhapāla phītaṃ kuruṃ ajjhāvasāmīti . taṃ kiṃ maññasi mahārāja idha te puriso āgaccheyya puratthimāya disāya saddhāyiko paccayiko . so taṃ upasaṅkamitvā evaṃ vadeyya yagghe mahārāja jāneyyāsi ahaṃ āgacchāmi puratthimāya disāya tatthaddasaṃ mahantaṃ janapadaṃ iddhañceva phītañca bahujanaṃ ākiṇṇamanussaṃ bahu tattha hatthikāyā assakāyā rathakāyā pattikāyā bahu tattha dantājinaṃ bahu tattha hiraññasuvaṇṇaṃ akatañceva katañca bahu tattha itthīpariggaho sakkāva tāvattakena balatthena abhivijinituṃ abhivijina mahārājāti kinti naṃ kareyyāsīti . tampi mayaṃ bho raṭṭhapāla abhivijjiya ajjhāvaseyyāmāti . taṃ kiṃ maññasi mahārāja idha te puriso āgaccheyya pacchimāya disāya ... uttarāya disāya ... dakkhiṇāya disāya ... parasamuddato saddhāyiko paccayiko . so taṃ upasaṅkamitvā evaṃ vadeyya yagghe mahārāja jāneyyāsi ahaṃ āgacchāmi parasamuddato tatthaddasaṃ mahantaṃ janapadaṃ iddhañceva phītañca bahujanaṃ ākiṇṇamanussaṃ bahu tattha hatthikāyā assakāyā Rathakāyā pattikāyā bahu tattha dantājinaṃ bahu tattha hiraññasuvaṇṇaṃ akatañceva katañca bahu tattha itthīpariggaho sakkāva tāvattakena balatthena abhivijinituṃ abhivijina mahārājāti kinti naṃ kareyyāsīti . Tampi mayaṃ bho raṭṭhapāla abhivijjiya ajjhāvaseyyāmāti . idaṃ kho taṃ mahārāja tena bhagavatā jānatā passatā arahatā sammāsambuddhena sandhāya bhāsitaṃ ūno loko atitto taṇhādāsoti yamahaṃ ñatvā ca disvā ca sutvā ca agārasmā anagāriyaṃ pabbajitoti. Acchariyaṃ bho raṭṭhapāla abbhūtaṃ bho raṭṭhapāla yāva subhāsitañcidaṃ tena bhagavatā jānatā passatā arahatā sammāsambuddhena ūno loko atitto taṇhādāsoti ūno hi bho raṭṭhapāla loko atitto taṇhādāsoti.