[458] Bhūtapubbaṃ ānanda devānaṃ tāvatiṃsānaṃ sudhammāyaṃ sabhāyaṃ sannisinnānaṃ sannipatitānaṃ ayamantarākathā udapādi lābhā vata bho videhānaṃ suladdhaṃ vata bho videhānaṃ yesaṃ nimi rājā dhammiko dhammarājā dhamme ṭhito mahārājā dhammaṃ carati brāhmaṇagahapatikesu negamesu ceva jānapadesu ca uposathañca upavasati cātuddasiṃ pañcadasiṃ aṭṭhamiṃ ca pakkhassāti.
[459] Atha kho ānanda sakko devānamindo deve tāvatiṃse āmantesi iccheyyātha no tumhe mārisā nimirājānaṃ daṭṭhunti icchāma mayaṃ mārisā nimirājānaṃ daṭṭhunti . tena kho panānanda samayena nimi rājā tadahuposathe paṇṇarase sīsanhāto uposathiko Upari pāsādavaragato nisinno hoti . atha kho ānanda sakko devānamindo seyyathāpi nāma balavā puriso sammiñjitaṃ vā bāhaṃ pasāreyya pasāritaṃ vā bāhaṃ sammiñjeyya evameva devesu tāvatiṃsesu antarahito nimissa rañño sammukhe pāturahosi. {459.1} Atha kho ānanda sakko devānamindo nimiṃ rājānaṃ etadavoca lābhā te mahārāja suladdhaṃ te mahārāja devā mahārāja tāvatiṃsā sudhammāyaṃ sabhāyaṃ kittayamānarūpā sannisinnā lābhā vata bho videhānaṃ suladdhaṃ vata bho videhānaṃ yesaṃ nimi rājā dhammiko dhammarājā dhamme ṭhito mahārājā dhammaṃ carati brāhmaṇagahapatikesu negamesu ceva jānapadesu ca uposathañca upavasati cātuddasiṃ pañcadasiṃ aṭṭhamiṃ ca pakkhassāti devā te mahārāja tāvatiṃsā dassanakāmā tassa te ahaṃ mahārāja sahassayuttaṃ ājaññarathaṃ pahiṇissāmi abhiruheyyāsi mahārāja dibbaṃ yānaṃ avikampamānoti . adhivāsesi kho ānanda nimi rājā tuṇhībhāvena . atha kho ānanda sakko devānamindo nimissa rañño adhivāsanaṃ viditvā seyyathāpi nāma balavā puriso sammiñjitaṃ vā bāhaṃ pasāreyya pasāritaṃ vā bāhaṃ sammiñjeyya evameva nimissa rañño sammukhe antarahito devesu tāvatiṃsesu pāturahosi.
[460] Atha kho ānanda sakko devānamindo mātaliṃ saṅgāhakaṃ āmantesi ehi tvaṃ samma mātali sahassayuttaṃ ājaññarathaṃ Yojetvā nimiṃ rājānaṃ upasaṅkamitvā evaṃ vadehi ayante mahārāja sahassayutto ājaññaratho sakkena devānamindena pesito abhirūheyyāsi mahārāja dibbaṃ yānaṃ avikampamānoti . evaṃ bhadantavāti kho ānanda mātali saṅgāhako sakkassa devānamindassa paṭissutvā sahassayuttaṃ ājaññarathaṃ yojetvā nimiṃ rājānaṃ upasaṅkamitvā etadavoca ayaṃ te mahārāja sahassayutto ājaññaratho sakkena devānamindena pesito abhirūha mahārāja dibbaṃ yānaṃ avikampamāno apica mahārāja katamena taṃ nemi yena vā pāpakammā pāpakānaṃ kammānaṃ vipākaṃ paṭisaṃvedenti yena vā kalyāṇakammā kalyāṇakammānaṃ vipākaṃ paṭisaṃvedentīti . ubhayeneva maṃ mātali nehīti . Saṃpavesi kho ānanda mātali saṅgāhako nimiṃ rājānaṃ sudhammāyaṃ sabhāyaṃ . {460.1} Addasā kho ānanda sakko devānamindo nimiṃ rājānaṃ dūratova āgacchantaṃ disvā nimiṃ rājānaṃ etadavoca ehi kho mahārāja svāgataṃ mahārāja devā te mahārāja tāvatiṃsā sudhammāyaṃ sabhāyaṃ kittayamānarūpā sannisinnā lābhā vata bho videhānaṃ suladdhaṃ vata bho videhānaṃ yesaṃ nimi rājā dhammiko dhammarājā dhamme ṭhito mahārājā dhammaṃ carati brāhmaṇagahapatikesu negamesu ceva jānapadesu ca uposathañca upavasati cātuddasiṃ pañcadasiṃ aṭṭhamiṃ ca pakkhassāti devā te mahārāja tāvatiṃsā Dassanakāmā abhirama mahārāja devesu devānubhāvenāti . alaṃ mārisa tattheva maṃ mithilaṃ paṭinetu tathāhaṃ dhammaṃ carissāmi brāhmaṇagahapatikesu negamesu ceva jānapadesu ca uposathañca upavasissāmi cātuddasiṃ pañcadasiṃ aṭṭhamiṃ ca pakkhassāti . atha kho ānanda sakko devānamindo mātaliṃ saṅgāhakaṃ āmantesi ehi tvaṃ samma mātali sahassayuttaṃ ājaññarathaṃ yojetvā nimiṃ rājānaṃ tattheva mithilaṃ paṭinehīti . evaṃ bhadantavāti kho ānanda mātali saṅgāhako sakkassa devānamindassa paṭissutvā sahassayuttaṃ ājaññarathaṃ yojetvā nimiṃ rājānaṃ tattheva mithilaṃ paṭinesi.