[50] Seyyathāpi gahapati aṅgārakāsu sādhikaporisā pūrā aṅgārānaṃ vītaccikānaṃ vītadhūmānaṃ atha puriso āgaccheyya jīvitukāmo amaritukāmo sukhakāmo dukkhapaṭikkūlo tamenaṃ dve balavanto purisā nānābāhāsu gahetvā aṅgārakāsuṃ upakaḍḍheyyuṃ taṃ kiṃ maññasi gahapati api nu so puriso iti cīti ceva kāyaṃ sannāmeyyāti . No hetaṃ bhante taṃ kissa hetu viditaṃ hi bhante tassa purisassa imañca ahaṃ aṅgārakāsuṃ papatissāmi tatonidānaṃ maraṇaṃ vā niggacchissāmi maraṇamattaṃ vā dukkhanti . evameva kho gahapati ariyasāvako iti paṭisañcikkhati aṅgārakāsūpamā kāmā vuttā bhagavatā bahudukkhā bahūpāyāsā ādīnavo ettha bhiyyoti evametaṃ yathābhūtaṃ sammappaññāya disvā .pe. tameva upekkhaṃ bhāveti.

[51] Seyyathāpi gahapati puriso supinakaṃ passeyya ārāmarāmaṇeyyakaṃ vanarāmaṇeyyakaṃ bhūmirāmaṇeyyakaṃ pokkharaṇirāmaṇeyyakaṃ so paṭibuddho na kiñci passeyya evameva kho gahapati ariyasāvako iti paṭisañcikkhati supinakūpamā kāmā vuttā bhagavatā bahudukkhā bahūpāyāsā ādīnavo ettha bhiyyoti .pe. Tameva upekkhaṃ bhāveti.

[52] Seyyathāpi gahapati puriso yācitakaṃ bhogaṃ yācitvā yānaṃ oropeyya pavaramaṇikuṇḍalaṃ so tehi yācitakehi bhogehi purakkhato Parivuto antarāpaṇaṃ paṭipajjeyya tamenaṃ jano disvā evaṃ vadeyya bhogī vata bho puriso evaṃ kira bhogino bhogāni bhuñjantīti tamenaṃ sāmikā yattha yattheva passeyyuṃ tattha tattheva sāmikā sāni hareyyuṃ taṃ kiṃ maññasi gahapati alaṃ nu kho tassa purisassa aññathattāyāti. No hetaṃ bhante taṃ kissa hetu sāmino hi bhante sāni harantīti. Evameva kho gahapati ariyasāvako iti paṭisañcikkhati yācitakūpamā kāmā vuttā bhagavatā bahudukkhā bahūpāyāsā ādīnavo ettha bhiyyoti .pe. Tameva upekkhaṃ bhāveti.

[53] Seyyathāpi gahapati gāmassa vā nigamassa vā avidūre tibbo vanasaṇḍo tatrassa rukkho sampannaphalo ca uppannaphalo ca na cāssu kānici phalāni bhūmiyaṃ patitāni atha puriso āgaccheyya phalatthiko phalagavesī phalapariyesanaṃ caramāno so taṃ vanasaṇḍaṃ ajjhogāhetvā taṃ rukkhaṃ passeyya sampannaphalañca uppannaphalañca tassa evamassa ayaṃ kho rukkho sampannaphalo ca uppannaphalo ca natthi ca kānici phalāni bhūmiyaṃ patitāni jānāmi kho panāhaṃ rukkhaṃ abhiruyhituṃ yannūnāhaṃ imaṃ rukkhaṃ abhiruyhitvā yāvadatthañca khādeyyaṃ ucchaṅgañca pūreyyanti so taṃ rukkhaṃ abhiruyhitvā yāvadatthañca khādeyya ucchaṅgañca pūreyya Atha dutiyo puriso āgaccheyya phalatthiko phalagavesī phalapariyesanaṃ caramāno tiṇhaṃ kudhāriṃ ādāya so taṃ vanasaṇḍaṃ ajjhogahetvā taṃ rukkhaṃ passeyya sampannaphalañca uppannaphalañca tassa evamassa ayaṃ rukkho sampannaphalo ca uppannaphalo ca natthi ca kānici phalāni bhūmiyaṃ patitāni na kho panāhaṃ jānāmi rukkhaṃ abhiruyhituṃ yannūnāhaṃ imaṃ rukkhaṃ mūlato chetvā yāvadatthañca khādeyyaṃ ucchaṅgañca pūreyyanti so taṃ rukkhaṃ mūlato chindeyya taṃ kiṃ maññasi gahapati amuko so puriso paṭhamaṃ rukkhaṃ āruḷho sace kho so na khippameva oroheyya tassa so rukkho papatanto hatthaṃ vā bhañjeyya pādaṃ vā bhañjeyya aññataraṃ vā aññataraṃ vā aṅgapaccaṅgaṃ bhañjeyya so tatonidānaṃ maraṇaṃ vā niggaccheyya maraṇamattaṃ vā dukkhanti. Evaṃ bhante. {53.1} Evameva kho gahapati ariyasāvako iti paṭisañcikkhati rukkhaphalūpamā kāmā vuttā bhagavatā bahudukkhā bahūpāyāsā ādīnavo ettha bhiyyoti evametaṃ yathābhūtaṃ sammappaññāya disvā yāyaṃ upekkhā nānattā nānattasitā taṃ abhinivajjetvā yāyaṃ upekkhā ekattā ekattasitā yattha sabbaso lokāmisupādānā aparisesā nirujjhanti tameva upekkhaṃ bhāveti.