[462] Atha kho ānanda nimi rājā kappakassa gāmavaraṃ Datvā jeṭṭhaputtaṃ kumāraṃ sādhukaṃ rajje samanusāsitvā imasmiṃyeva maghadevambavane kesamassuṃ ohāretvā kāsāyāni vatthāni acchādetvā agārasmā anagāriyaṃ pabbaji . so mettāsahagatena cetasā ekaṃ disaṃ pharitvā vihāsi . tathā dutiyaṃ tathā tatiyaṃ tathā catutthaṃ . iti uddhamadho tiriyaṃ sabbadhi sabbatthatāya sabbāvantaṃ lokaṃ mettāsahagatena cetasā vipulena mahaggatena appamāṇena averena abyāpajjhena pharitvā vihāsi . karuṇāsahagatena cetasā ... Muditāsahagatena cetasā ... upekkhāsahagatena cetasā ekaṃ disaṃ pharitvā vihāsi . tathā dutiyaṃ tathā tatiyaṃ tathā catutthaṃ . Iti uddhamadho tiriyaṃ sabbadhi sabbatthatāya sabbāvantaṃ lokaṃ upekkhāsahagatena cetasā vipulena mahaggatena appamāṇena averena abyāpajjhena pharitvā vihāsi . nimi kho panānanda rājā caturāsītivassasahassāni kumārakīḷikaṃ kīḷi caturāsītivassasahassāni uparajjaṃ kāresi caturāsītivassasahassāni rajjaṃ kāresi caturāsītivassasahassāni imasmiṃyeva maghadevambavane agārasmā anagāriyaṃ pabbajito brahmacariyaṃ cari . so cattāro brahmavihāre bhāvetvā kāyassa bhedā parammaraṇā brahmalokūpago ahosi.

[463] Nimissa kho panānanda rañño kaḷārajanako nāma putto ahosi . so na agārasmā anagāriyaṃ pabbaji . so taṃ kalyāṇaṃ vattaṃ samucchindi. So tesaṃ antimapuriso ahosi. {463.1} Siyā kho pana te ānanda evamassa añño nūna tena samayena rājā maghadevo ahosi yena taṃ kalyāṇaṃ vattaṃ nihitanti. Na kho panetaṃ ānanda evaṃ daṭṭhabbaṃ . ahaṃ tena samayena rājā maghadevo ahosiṃ . ahaṃ taṃ kalyāṇaṃ vattaṃ nihiniṃ mayā taṃ kalyāṇaṃ vattaṃ nihitaṃ pacchimā janatā anuppavattesi . taṃ kho panānanda kalyāṇaṃ vattaṃ na nibbidāya na virāgāya na nirodhāya na upasamāya na abhiññāya na sambodhāya na nibbānāya saṃvattati yāvadeva brahmalokūpapattiyā . idaṃ kho panānanda etarahi mayā kalyāṇaṃ vattaṃ nihitaṃ ekantanibbidāya virāgāya nirodhāya upasamāya abhiññāya sambodhāya nibbānāya saṃvattati . katamañcānanda etarahi mayā kalyāṇaṃ vattaṃ nihitaṃ ekantanibbidāya virāgāya nirodhāya upasamāya abhiññāya sambodhāya nibbānāya saṃvattati. {463.2} Ayameva ariyo aṭṭhaṅgiko maggo seyyathīdaṃ sammādiṭṭhi sammāsaṅkappo sammāvācā sammākammanto sammāājīvo sammāvāyāmo sammāsati sammāsamādhi idaṃ kho ānanda etarahi mayā kalyāṇaṃ vattaṃ nihitaṃ ekantanibbidāya virāgāya nirodhāya upasamāya abhiññāya sambodhāya nibbānāya saṃvattati . taṃ vo ahaṃ ānanda evaṃ vadāmi yena me idaṃ kalyāṇaṃ vattaṃ nihitaṃ anuppavatteyyātha mā kho me tumhe antimapurisā ahuvattha yasmiṃ kho ānanda purisayuge vattamāne evarūpassa kalyāṇassa Vattassa samucchedo hoti so tesaṃ antimapuriso hoti . taṃ vo ahaṃ ānanda evaṃ vadāmi yena me idaṃ kalyāṇaṃ vattaṃ nihitaṃ anuppavatteyyātha mā kho me tumhe antimapurisā ahuvatthāti. Idamavoca bhagavā attamano āyasmā ānando bhagavato bhāsitaṃ abhinandīti. Maghadevasuttaṃ niṭṭhitaṃ tatiyaṃ. --------