[496] Tassa mayhaṃ rājakumāra etadahosi yannūnāhaṃ appānakaṃ jhānaṃ jhāyeyyanti . so kho ahaṃ rājakumāra mukhato ca nāsato ca assāsapassāse uparundhiṃ . tassa mayhaṃ rājakumāra mukhato ca nāsato ca assāsapassāsesu uparuddhesu kaṇṇasotehi Vātānaṃ nikkhantānaṃ adhimatto saddo hoti . seyyathāpi nāma kammāragaggariyā dhamamānāya adhimatto saddo hoti evameva kho me rājakumāra mukhato ca nāsato ca assāsapassāsesu uparuddhesu kaṇṇasotehi vātānaṃ nikkhantānaṃ adhimatto saddo hoti . āraddhaṃ kho pana me rājakumāra viriyaṃ hoti asallīnaṃ upaṭṭhitā sati appammuṭṭhā sāraddho ca pana me kāyo hoti appaṭippassaddho teneva dukkhappadhānena padhānābhitunnassa sato.

[497] Tassa mayhaṃ rājakumāra etadahosi yannūnāhaṃ appānakaṃyeva jhānaṃ jhāyeyyanti . so kho ahaṃ rājakumāra mukhato ca nāsato ca kaṇṇasotato ca assāsapassāse uparundhiṃ . tassa mayhaṃ rājakumāra mukhato ca nāsato ca kaṇṇasotato ca assāsapassāsesu uparuddhesu adhimattā vātā muddhānaṃ ohananti . seyyathāpi rājakumāra balavā puriso tiṇhena sikharena muddhānaṃ abhimattheyya evameva kho me rājakumāra mukhato ca nāsato ca kaṇṇasotato ca assāsapassāsesu uparuddhesu adhimattā vātā muddhānaṃ ohananti . āraddhaṃ kho pana me rājakumāra viriyaṃ hoti asallīnaṃ upaṭṭhitā sati appammuṭṭhā sāraddho ca pana me kāyo hoti appaṭippassaddho teneva dukkhappadhānena padhānābhitunnassa sato.

[498] Tassa mayhaṃ rājakumāra etadahosi yannūnāhaṃ appānakaṃyeva jhānaṃ jhāyeyyanti . so kho ahaṃ rājakumāra mukhato ca nāsato ca kaṇṇasotato ca assāsapassāse uparundhiṃ . tassa mayhaṃ rājakumāra mukhato ca nāsato ca kaṇṇasotato ca assāsapassāsesu uparuddhesu adhimattā sīse sīsavedanā honti . seyyathāpi rājakumāra balavā puriso daḷhena varattakkhandhena sīse sīsaveṭṭhanaṃ dadeyya evameva kho me rājakumāra mukhato ca nāsato ca kaṇṇasotato ca assasāsapassāsesu uparuddhesu adhimattā sīse sīsavedanā honti . āraddhaṃ kho pana me rājakumāra viriyaṃ hoti asallīnaṃ upaṭṭhitā sati appammuṭṭhā sāraddho ca pana me kāyo hoti appaṭippassaddho teneva dukkhappadhānena padhānābhitunnassa sato.