[521] Evamme sutaṃ ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme . tena kho pana samayena rañño pasenadissa kosalassa vijite coro aṅgulimālo nāma hoti luddo lohitapāṇī hatapahate niviṭṭho adayāpanno pāṇabhūtesu . Tena gāmāpi agāmā katā nigamāpi anigamā katā janapadāpi ajanapadā katā . so manusse vadhitvā vadhitvā aṅgulīnaṃ mālaṃ dhāreti. Atha kho bhagavā pubbaṇhasamayaṃ nivāsetvā pattacīvaramādāya sāvatthiṃ piṇḍāya pāvisi sāvatthiyaṃ piṇḍāya caritvā pacchābhattaṃ piṇḍapātapaṭikkanto senāsanaṃ saṃsāmetvā pattacīvaraṃ ādāya yena coro aṅgulimālo tenaddhānamaggaṃ paṭipajji . addasaṃsu kho gopālakā pasupālakā kassakā padhāvino bhagavantaṃ yena coro aṅgulimālo tenaddhānamaggapaṭipannaṃ disvāna bhagavantaṃ etadavocuṃ mā samaṇa etaṃ maggaṃ paṭipajji etasmiṃ samaṇa magge coro aṅgulimālo nāma luddo lohitapāṇī hatapahate niviṭṭho adayāpanno pāṇabhūtesu tena gāmāpi agāmā katā nigamāpi anigamā katā janapadāpi ajanapadā katā so manusse vadhitvā vadhitvā aṅgulīnaṃ mālaṃ dhāreti etañhi samaṇa maggaṃ dasapi purisā vīsampi purisā tiṃsampi purisā cattāḷīsampi Purisā saṅgaritvā saṅgaritvā paṭipajjanti tepi corassa aṅgulimālassa hatthatthaṃ gacchantīti . evaṃ vutte bhagavā tuṇhībhūto agamāsi.

[522] Dutiyampi kho gopālakā pasupālakā kassakā padhāvino bhagavantaṃ etadavocuṃ mā samaṇa etaṃ maggaṃ paṭipajji etasmiṃ samaṇa magge coro aṅgulimālo nāma luddo lohitapāṇī hatapahate niviṭṭho adayāpanno pāṇabhūtesu tena gāmāpi agāmā katā nigamāpi anigamā katā janapadāpi ajanapadā katā so manusse vadhitvā vadhitvā aṅgulīnaṃ mālaṃ dhāreti etañhi samaṇa maggaṃ dasapi purisā vīsampi purisā tiṃsampi purisā cattāḷīsampi purisā saṅgaritvā saṅgaritvā paṭipajjanti tepi corassa aṅgulimālassa hatthatthaṃ gacchantīti. Atha kho bhagavā tuṇhībhūto agamāsi.