[527] Ekamantaṃ nisinnaṃ kho rājānaṃ pasenadikosalaṃ bhagavā etadavoca kinnu te mahārāja rājā māgadho seniyo bimbisāro kupito vesālikā vā licchavī aññe vā paṭirājānoti . na kho me bhante rājā māgadho seniyo bimbisāro kupito napi vesālikā licchavī napi aññe paṭirājāno coro me bhante vijite aṅgulimālo nāma luddo lohitapāṇī hatapahate niviṭṭho adayāpanno pāṇabhūtesu tena gāmāpi agāmā katā nigamāpi anigamā katā janapadāpi ajanapadā katā so manusse vadhitvā vadhitvā aṅgulīnaṃ mālaṃ dhāreti tāhaṃ bhante paṭisedhissāmīti. Sace pana tvaṃ mahārāja aṅgulimālaṃ passeyyāsi kesamassuṃ ohāretvā kāsāyāni vatthāni acchādetvā agārasmā anagāriyaṃ pabbajitaṃ virataṃ pāṇātipātā virataṃ adinnādānā virataṃ musāvādā ekabhattikaṃ brahmacāriṃ sīlavantaṃ kalyāṇadhammaṃ kinti taṃ kareyyāsīti . Abhivādeyyāma vā bhante paccuṭṭheyyāma vā āsanena vā nimanteyyāma abhinimanteyyāma vā naṃ cīvarapiṇḍapātasenāsana- gilānapaccayabhesajjaparikkhārehi dhammikaṃ vā assa rakkhāvaraṇaguttiṃ saṃvidaheyyāma kuto panassa bhante dussīlassa pāpadhammassa evarūpo sīlasaṃyamo bhavissatīti.
[528] Tena kho pana samayena āyasmā aṅgulimālo bhagavato Avidūre nisinno hoti . atha kho bhagavā dakkhiṇabāhaṃ paggahetvā rājānaṃ pasenadikosalaṃ etadavoca eso mahārāja aṅgulimāloti . Atha kho rañño pasenadissa kosalassa ahudeva bhayaṃ ahu chambhitattaṃ ahu lomahaṃso . atha kho bhagavā rājānaṃ pasenadikosalaṃ bhītaṃ saṃviggalomahaṭṭhajātaṃ viditvā rājānaṃ pasenadikosalaṃ etadavoca mā bhāyi mahārāja mā bhāyi mahārāja natthi te ito bhayanti . Atha kho rañño pasenadissa kosalassa yaṃ ahosi bhayaṃ vā chambhitattaṃ vā lomahaṃso vā so paṭippassambhi . atha kho rājā pasenadi kosalo yenāyasmā aṅgulimālo tenupasaṅkami upasaṅkamitvā āyasmantaṃ aṅgulimālaṃ etadavoca ayyo no bhante aṅgulimāloti . evaṃ mahārājāti . Kathaṃgotto [2]- ayyassa pitā kathaṃgottā ayyassa mātāti . gaggo kho mahārāja pitā mantānī mātāti . abhiramatu bhante ayyo gaggo mantānīputto ahamayyassa gaggassa mantānīputtassa ussukkaṃ karissāmi cīvarapiṇḍapātasenāsanagilānapaccayabhesajjaparikkhārānanti . tena kho pana samayena āyasmā aṅgulimālo āraññako hoti piṇḍapātiko paṃsukūliko tecīvariko . atha kho āyasmā aṅgulimālo rājānaṃ pasenadikosalaṃ etadavoca alaṃ mahārāja paripuṇṇaṃ me ticīvaranti.