[561] Atha kho rājā pasenadi kosalo bhadraṃ yānaṃ abhirūhitvā bhadrehi bhadrehi yānehi nagarakamhā yena medaḷupaṃ nāma Sakyānaṃ nigamo tena pāyāsi teneva divasāvasesena medaḷupaṃ nāma sakyānaṃ nigamaṃ sampāpuṇi yena ārāmo tena pāyāsi yāvatikā yānassa bhūmi yānena gantvā yānā paccorohitvā pattikova ārāmaṃ pāvisi . tena kho pana samayena sambahulā bhikkhū abbhokāse caṅkamanti. {561.1} Atha kho rājā pasenadi kosalo yena te bhikkhū tenupasaṅkami upasaṅkamitvā te bhikkhū etadavoca kahaṃ nu kho bhante etarahi so bhagavā viharati arahaṃ sammāsambuddho dassanakāmā hi mayantaṃ bhagavantaṃ arahantaṃ sammāsambuddhanti . eso mahārāja vihāro saṃvutadvāro tena appasaddo upasaṅkamitvā ataramāno āḷindaṃ pavisitvā ukkāsitvā aggaḷaṃ ākoṭṭehi vivarissati te bhagavā dvāranti. {561.2} Atha kho rājā pasenadi kosalo tattheva khaggañca uṇhisañca dīghassa kārāyanassa pādāsi . atha kho dīghassa kārāyanassa etadahosi rahāyati khodāni mahārājā idhevadāni mayā ṭhātabbanti . atha kho rājā pasenadi kosalo yena so vihāro saṃvutadvāro tena appasaddo upasaṅkamitvā ataramāno āḷindaṃ pavisitvā ukkāsitvā aggaḷaṃ ākoṭṭesi . Vivari bhagavā dvāraṃ. Atha kho rājā pasenadi kosalo vihāraṃ pavisitvā bhagavato pādesu sirasā nipatitvā bhagavato pādāni mukhena ca paricumbati pāṇīhi ca parisambāhati nāmañca sāveti rājāhaṃ bhante pasenadi kosalo rājāhaṃ bhante Pasenadi kosaloti . kiṃ pana tvaṃ mahārāja atthavasaṃ sampassamāno imasmiṃ sarīre evarūpaṃ paramanipaccakāraṃ karosi mittūpahāraṃ upadaṃsesīti.
[562] Atthi kho me bhante bhagavati dhammanvayo hoti sammāsambuddho bhagavā svākkhāto bhagavatā dhammo supaṭipanno bhagavato sāvakasaṅghoti . idhāhaṃ bhante bhagavā passāmi eke samaṇabrāhmaṇe pariyantakataṃ brahmacariyaṃ carante dasapi vassāni vīsampi vassāni tiṃsampi vassāni cattāḷīsampi vassāni . te aparena samayena sunhātā suvilittā kappitakesamassū pañcahi kāmaguṇehi samappitā samaṅgībhūtā paricārenti . idha panāhaṃ bhante bhikkhū passāmi yāvajīvaṃ āpāṇakoṭikaṃ paripuṇṇaṃ parisuddhaṃ brahmacariyaṃ carante . na kho panāhaṃ bhante ito bahiddhā aññaṃ evaṃ paripuṇṇaṃ parisuddhaṃ brahmacariyaṃ samanupassāmi . ayampi kho me bhante bhagavati dhammanvayo hoti sammāsambuddho bhagavā svākkhāto bhagavatā dhammo supaṭipanno bhagavato sāvakasaṅghoti.