[565] Puna caparāhaṃ bhante rājā khattiyo muddhāvasitto pahomi ghātetāyaṃ vā ghātetuṃ jāpetāyaṃ vā jāpetuṃ pabbājetāyaṃ vā pabbājetuṃ . tassa mayhaṃ bhante aṭṭakaraṇe nisinnassa antarantarā kathaṃ opātenti sohaṃ na labhāmi mā me bhonto aṭṭakaraṇe nisinnassa antarantarā kathaṃ opātetha kathāpariyosānaṃ me bhavanto āgamentūti . tassa mayhaṃ bhante antarantarā kathaṃ opātenti . idha panāhaṃ bhante bhikkhū passāmi yasmiṃ samaye bhagavā anekasatāya parisāya dhammaṃ deseti neva tasmiṃ samaye bhagavato sāvakānaṃ khipitasaddo vā hoti ukkāsitasaddo vā . Bhūtapubbaṃ bhante bhagavā anekasatāya parisāya dhammaṃ desesi tatra aññataro bhagavato sāvako ukkāsi . tamenaṃ aññataro sabrahmacārī Jannukena ghaṭṭesi appasaddo āyasmā hotu mā āyasmā saddamakāsi satthā no bhagavā dhammaṃ desetīti . tassa mayhaṃ bhante etadahosi acchariyaṃ vata bho abbhūtaṃ vata bho adaṇḍena vata kira bho asatthena evaṃ suvinītā parisā bhavissatīti . na kho panāhaṃ bhante ito bahiddhā aññaṃ evaṃ suvinītaṃ parisaṃ samanupassāmi . ayampi kho me bhante bhagavati dhammanvayo hoti sammāsambuddho bhagavā svākkhāto bhagavatā dhammo supaṭipanno bhagavato sāvakasaṅghoti.
[566] Puna caparāhaṃ bhante passāmi idhekacce khattiyapaṇḍite nipuṇe kataparappavāde vāḷavedhirūpe . te bhindantā maññe caranti paññāgatena diṭṭhigatāni . te suṇanti samaṇo khalu bho gotamo amukaṃ nāma gāmaṃ vā nigamaṃ vā osarissatīti. Te pañhaṃ abhisaṅkharonti imaṃ mayaṃ pañhaṃ samaṇaṃ gotamaṃ upasaṅkamitvā pucchissāma evañce no puṭṭho evaṃ byākarissati evamassa mayaṃ vādaṃ āropessāma evañcepi no puṭṭho evaṃ byākarissati evampissa mayaṃ vādaṃ āropessāmāti . te suṇanti samaṇo khalu bho gotamo amukaṃ nāma gāmaṃ vā nigamaṃ vā osaṭoti . te yena bhagavā tenupasaṅkamanti . te bhagavā dhammiyā kathāya sandasseti samādapeti samuttejeti sampahaṃseti . te bhagavatā dhammiyā kathāya sandassitā samādapitā samuttejitā sampahaṃsitā na ceva bhagavantaṃ Pañhaṃ pucchanti kutassa vādaṃ āropessanti aññadatthuṃ bhagavato sāvakā sampajjanti . ayampi kho me bhante bhagavati dhammanvayo hoti sammāsambuddho bhagavā svākkhāto bhagavatā dhammo supaṭipanno bhagavato sāvakasaṅghoti.