[567] Puna caparāhaṃ bhante passāmi idhekacce brāhmaṇapaṇḍite .pe. gahapatipaṇḍite ... samaṇapaṇḍite nipuṇe kataparappavāde vāḷavedhirūpe . te bhindantā maññe caranti paññāgatena diṭṭhigatāni . te suṇanti samaṇo khalu bho gotamo amukaṃ nāma gāmaṃ vā nigamaṃ vā osarissatīti . te pañhaṃ abhisaṅkharonti imaṃ mayaṃ pañhaṃ samaṇaṃ gotamaṃ upasaṅkamitvā pucchissāma evañce no puṭṭho evaṃ byākarissati evamassa mayaṃ vādaṃ āropessāma evañcepi no puṭṭho evaṃ byākarissati evaṃpissa mayaṃ vādaṃ āropessāmāti . te suṇanti samaṇo khalu bho gotamo amukaṃ nāma gāmaṃ vā nigamaṃ vā osaṭoti . te yena bhagavā tenupasaṅkamanti. Te bhagavā dhammiyā kathāya sandasseti samādapeti samuttejeti sampahaṃseti . te bhagavatā dhammiyā kathāya sandassitā samādapitā samuttejitā sampahaṃsitā na ceva bhagavantaṃ pañhaṃ pucchanti kutassa vādaṃ āropessanti aññadatthuṃ bhagavantaṃyeva okāsaṃ yācanti agārasmā anagāriyaṃ pabbajjāya . te bhagavā pabbājeti. Te tathā Pabbajitā samānā vūpakaṭṭhā appamattā ātāpino pahitattā viharantā nacirasseva yassatthāya kulaputtā sammadeva agārasmā anagāriyaṃ pabbajanti tadanuttaraṃ brahmacariyapariyosānaṃ diṭṭheva dhamme sayaṃ abhiññā sacchikatvā upasampajja viharanti . te evamāhaṃsu mayaṃ vata bho anassāma mayaṃ hi pubbe assamaṇāva samānā samaṇāmhāti paṭijānimhā abrāhmaṇāva samānā brāhmaṇāmhāti paṭijānimhā anarahantova samānā arahantomhāti paṭijānimhā idāni khomha samaṇā idāni khomha brāhmaṇā idāni khomha arahantoti . ayampi kho me bhante bhagavati dhammanvayo hoti sammāsambuddho bhagavā svākkhāto bhagavatā dhammo supaṭipanno bhagavato sāvakasaṅghoti.
[568] Puna caparaṃ bhante ime isidantapurāṇā thapatayo mamabhattā mamayānā ahaṃ nesaṃ jīvitaṃ dātā yasassa āhattā atha ca pana no tathā mayi nipaccakāraṃ karonti yathā bhagavati . Bhūtapubbāhaṃ bhante senaṃ abbhuyyāto samāno ime isidanta- purāṇe thapatayo vīmaṃsamāno aññatarasmiṃ sambādhe āvasathe vāsaṃ upagacchiṃ . atha kho bhante ime isidantapurāṇā thapatayo bahudeva rattiṃ dhammiyā kathāya vītināmetvā yato assosuṃ kho Bhagavantaṃ tato sīsaṃ katvā maṃ pādato karitvā nipajjiṃsu . tassa mayhaṃ bhante etadahosi acchariyaṃ vata bho abbhūtaṃ vata bho ime isidantapurāṇā thapatayo mamabhattā mamayānā ahaṃ nesaṃ jīvitaṃ dātā yasassa āhattā atha ca pana no tathā mayi nipaccakāraṃ karonti yathā bhagavati . addhā ime āyasmanto tassa bhagavato sāsane oḷāraṃ pubbenāparaṃ visesaṃ jānantīti . Ayampi kho bhante bhagavati dhammanvayo hoti sammāsambuddho bhagavā svākkhāto bhagavatā dhammo supaṭipanno bhagavato sāvakasaṅghoti.