[593] Evaṃ bhoti kho so māṇavako brahmāyussa brāhmaṇassa paṭissutvā yena bhagavā tenupasaṅkami upasaṅkamitvā bhagavatā saddhiṃ sammodi sammodanīyaṃ kathaṃ sārāṇīyaṃ vītisāretvā ekamantaṃ aṭṭhāsi . ekamantaṃ ṭhito kho māṇavako bhagavantaṃ etadavoca brahmāyu bho gotama brāhmaṇo bhavantaṃ gotamaṃ appābādhaṃ appātaṅkaṃ lahuṭṭhānaṃ balaṃ phāsuvihāraṃ pucchati brahmāyu bho gotama brāhmaṇo jiṇṇo vuḍḍho mahallako addhagato vayoanuppatto vīsavassasatiko jātiyā tiṇṇaṃ vedānaṃ pāragū sanighaṇḍukeṭubhānaṃ sākkharappabhedānaṃ itihāsapañcamānaṃ padako veyyākaraṇo Lokāyatamahāpurisalakkhaṇesu anavayo yāvatā bho brāhmaṇagahapatikā mithilāyaṃ paṭivasanti brahmāyu tesaṃ brāhmaṇo aggamakkhāyati yadidaṃ bhogehi brahmāyu tesaṃ brāhmaṇo aggamakkhāyati yadidaṃ mantehi brahmāyu tesaṃ brāhmaṇo aggamakkhāyati yadidaṃ āyunā ceva yasasā ca so bhoto gotamassa dassanakāmoti. Yassadāni māṇava brahmāyu brāhmaṇo kālaṃ maññatīti . Atha kho so māṇavako yena brahmāyu brāhmaṇo tenupasaṅkami upasaṅkamitvā brahmāyuṃ brāhmaṇaṃ etadavoca katāvakāso kho bhavaṃ samaṇena gotamena yassadāni bhavaṃ kālaṃ maññatīti.
[594] Atha kho brahmāyu brāhmaṇo yena bhagavā tenupasaṅkami. Addasā kho sā parisā brahmāyuṃ brāhmaṇaṃ dūratova āgacchantaṃ disvā oramattha okāsamakāsi yathātaṃ ñātassa yasassino . atha kho brahmāyu brāhmaṇo taṃ parisaṃ etadavoca alaṃ bho nisīdatha tumhe sake āsane idhāhaṃ samaṇassa gotamassa santike nisīdissāmīti . atha kho brahmāyu brāhmaṇo yena bhagavā tenupasaṅkami upasaṅkamitvā bhagavatā saddhiṃ sammodi sammodanīyaṃ kathaṃ sārāṇīyaṃ vītisāretvā ekamantaṃ nisīdi . ekamantaṃ nisinno kho brahmāyu brāhmaṇo bhagavato kāye dvattiṃsa mahāpurisalakkhaṇāni sammannesi . addasā kho brahmāyu brāhmaṇo Bhagavato kāye dvattiṃsa mahāpurisalakkhaṇāni yebhuyyena ṭhapetvā dve dvīsu mahāpurisalakkhaṇesu kaṅkhati vicikicchati nādhimuccati na saṃpasīdati kosohite ca vatthaguyhe pahutajivhatāya ca . atha kho brahmāyu brāhmaṇo bhagavantaṃ gāthāhi ajjhabhāsi ye me dvattiṃsāti sutā mahāpurisalakkhaṇā duve tesaṃ na passāmi bhoto kāyasmi gotama kacci kosohitaṃ bhoto vatthaguyhaṃ naruttama nārīsaha nāma savhayā kacci jivhā narassikā kacci pahutajivhosi yathātaṃ jāniyāmase ninnāmayetaṃ tanukaṃ kaṅkhaṃ vinaya no ise diṭṭhadhammahitatthāya samparāyasukhāya ca katāvakāsā pucchāma yaṅkiñci abhipatthitanti.