[595] Atha kho bhagavato etadahosi passati kho me ayaṃ brahmāyu brāhmaṇo dvattiṃsa mahāpurisalakkhaṇāni yebhuyyena ṭhapetvā dve dvīsu mahāpurisalakkhaṇesu kaṅkhati vicikicchati nādhimuccati na saṃpasīdati kosohite ca vatthaguyhe pahutajivhatāya cāti . atha kho bhagavā tathārūpaṃ iddhābhisaṅkhāraṃ abhisaṅkhāresi yathā addasa brahmāyu brāhmaṇo bhagavato kosohitaṃ vatthaguyhaṃ . atha kho bhagavā jivhaṃ ninnāmetvā ubhopi kaṇṇasotāni anumasi paṭimasi ubhopi Nāsikasotāni anumasi paṭimasi kevalakappaṃ nalāṭamaṇḍalaṃ jivhāya chādesi . atha kho bhagavā brahmāyuṃ brāhmaṇaṃ gāthāhi ajjhabhāsi ye te dvattiṃsāti sutā mahāpurisalakkhaṇā sabbe te mama kāyasmiṃ mā te kaṅkhāhu brāhmaṇa abhiññeyyaṃ abhiññātaṃ bhāvetabbañca bhāvitaṃ pahātabbaṃ pahīnaṃ me tasmā buddhosmi brāhmaṇa diṭṭhadhammahitatthāya samparāyasukhāya ca katāvakāso pucchassu yaṅkiñci abhipatthitanti.

[596] Atha kho brahmāyussa brāhmaṇassa etadahosi katāvakāso khomhi samaṇena gotamena kiṃ nu kho ahaṃ samaṇaṃ gotamaṃ puccheyyaṃ diṭṭhadhammikaṃ vā atthaṃ samparāyikaṃ vāti . atha kho brahmāyussa brāhmaṇassa etadahosi kusalo kho ahaṃ diṭṭhadhammikānaṃ atthānaṃ aññepi maṃ diṭṭhadhammikaṃ atthaṃ pucchanti yannūnāhaṃ samaṇaṃ gotamaṃ samparāyikameva atthaṃ puccheyyanti . atha kho brahmāyu brāhmaṇo bhagavantaṃ gāthāhi ajjhabhāsi kathaṃ kho brāhmaṇo hoti kathaṃ bhavati vedagū tevijjo bho kathaṃ hoti sotthiyo kinti vuccati arahaṃ bho kathaṃ hoti kathaṃ bhavati kevalī muni ca bho kathaṃ hoti buddho kinti pavuccatīti.

[597] Atha kho bhagavā brahmāyuṃ brāhmaṇaṃ gāthāhi paccabhāsi pubbenivāsaṃ yo vedī saggāpāyañca passati atho jātikkhayaṃ patto abhiññāvosito muni cittaṃ visuddhaṃ jānāti muttaṃ rāgehi sabbaso pahīnajātimaraṇo brahmacariyassa kevalī pāragū sabbadhammānaṃ buddho tādi pavuccatīti.

[598] Evaṃ vutte brahmāyu brāhmaṇo uṭṭhāyāsanā ekaṃsaṃ uttarāsaṅgaṃ karitvā bhagavato pādesu sirasā nipatitvā bhagavato pādāni mukhena ca paricumbati pāṇīhi parisambāhati nāmañca sāveti brahmāyvāhaṃ bho gotama brāhmaṇo brahmāyvāhaṃ bho gotama brāhmaṇoti . atha kho sā parisā acchariyabbhūtajātā ahosi acchariyaṃ vata bho abbhūtaṃ vata bho samaṇassa mahiddhikatā mahānubhāvatā yatra hi nāmāyaṃ brahmāyu brāhmaṇo ñāto yasassī evarūpaṃ paramaṃ nipaccakāraṃ karissatīti . atha kho bhagavā brahmāyuṃ brāhmaṇaṃ etadavoca alaṃ brāhmaṇa uṭṭhaha nisīda tvaṃ sake āsane yato te mayi cittaṃ pasannanti . Atha kho brahmāyu brāhmaṇo uṭṭhahitvā sake āsane nisīdi.