[606] Tena kho pana samayena selo brāhmaṇo āpaṇe paṭivasati tiṇṇaṃ vedānaṃ pāragū sanighaṇḍukeṭubhānaṃ sākkharappabhedānaṃ itihāsapañcamānaṃ padako veyyākaraṇo lokāyatamahāpurisalakkhaṇesu anavayo tīṇi māṇavakasatāni mante vāceti . tena kho pana samayena keṇiyo jaṭilo sele brāhmaṇe abhippasanno hoti . atha kho selo brāhmaṇo tīhi māṇavakasatehi parivuto jaṅghāvihāraṃ anucaṅkamamāno anuvicaramāno yena keṇiyassa jaṭilassa assamo tenupasaṅkami. {606.1} Addasā kho selo brāhmaṇo keṇiyasmiṃ jaṭile appekacce uddhanāni khanante appekacce kaṭṭhāni phālente appekacce bhājanāni dhovante appekacce udakamaṇikaṃ patiṭṭhāpente appekacce āsanāni paññāpente keṇiyaṃ jaṭilaṃ sāmaññeva maṇḍalamāḷaṃ paṭiyādentaṃ disvāna keṇiyaṃ jaṭilaṃ etadavoca kiṃ nu bhoto keṇiyassa āvāho vā bhavissati vivāho vā bhavissati mahāyañño vā paccupaṭṭhito rājā māgadho seniyo bimbisāro nimantito svātanāya saddhiṃ balakāyenāti . na me bho sela Āvāho vā bhavissati napi vivāho vā bhavissati napi rājā māgadho seniyo bimbisāro nimantito svātanāya saddhiṃ balakāyena apica kho me mahāyañño paccupaṭṭhito atthi samaṇo gotamo sakyaputto sakyakulā pabbajito aṅguttarāpesu cārikañcaramāno mahatā bhikkhusaṅghena saddhiṃ aḍḍhaterasehi bhikkhusatehi āpaṇaṃ anuppatto taṃ kho pana bhavantaṃ gotamaṃ evaṃkalyāṇo kittisaddo abbhuggato itipi so bhagavā arahaṃ sammāsambuddho vijjācaraṇasampanno sugato lokavidū anuttaro purisadammasārathi satthā devamanussānaṃ buddho bhagavāti so me nimantito svātanāya saddhiṃ bhikkhusaṅghenāti. Buddhoti bho keṇiya vadesīti . buddhoti bho sela vadāmīti. Buddhoti bho keṇiya vadesīti. Buddhoti bho sela vadāmīti. {606.2} Atha kho selassa brāhmaṇassa etadahosi ghosopi kho eso dullabho lokasmiṃ yadidaṃ buddhoti āgatāni kho panamhākaṃ mantesu dvattiṃsa mahāpurisalakkhaṇāni yehi samannāgatassa mahāpurisassa dveva gatiyo bhavanti anaññā sace agāraṃ ajjhāvasati rājā hoti cakkavatti dhammiko dhammarājā cāturanto vijitāvī janapadatthā viriyappatto sattaratanasamannāgato tassimāni satta ratanāni bhavanti seyyathīdaṃ cakkaratanaṃ hatthiratanaṃ assaratanaṃ maṇiratanaṃ itthīratanaṃ gahapatiratanaṃ parināyakaratanameva sattamaṃ parosahassaṃ kho panassa puttā bhavanti sūrā vīraṅgarūpā parasenappamaddanā So imaṃ paṭhaviṃ sāgarapariyantaṃ adaṇḍena asatthena dhammena abhivijiya ajjhāvasati sace pana agārasmā anagāriyaṃ pabbajati arahaṃ hoti sammāsambuddho loke vivaṭacchado kahaṃ pana bho keṇiya etarahi so bhavaṃ gotamo viharati arahaṃ sammāsambuddhoti.