[644] Evaṃ vutte ghoṭamukho brāhmaṇo āyasmantaṃ udenaṃ etadavoca abhikkantaṃ bho udena abhikkantaṃ bho udena seyyathāpi bho udena nikkujjitaṃ vā ukkujjeyya paṭicchannaṃ vā vivareyya mūḷhassa vā maggaṃ ācikkheyya andhakāre vā telapajjotaṃ dhāreyya cakkhumanto rūpāni dakkhantīti evameva bhotā udenena anekapariyāyena dhammo pakāsito esāhaṃ bhavantaṃ udenaṃ saraṇaṃ gacchāmi dhammañca bhikkhusaṅghañca upāsakaṃ maṃ bhavaṃ udeno dhāretu ajjatagge pāṇupetaṃ saraṇaṅgatanti . mā kho maṃ tvaṃ brāhmaṇa saraṇaṃ agamāsi tameva tvaṃ bhagavantaṃ saraṇaṃ gacchāhi yamahaṃ saraṇaṃ gatoti . kahaṃ pana bho udena etarahi so bhavaṃ gotamo viharati arahaṃ sammāsambuddhoti . parinibbuto kho brāhmaṇa etarahi so bhagavā arahaṃ sammāsambuddhoti. {644.1} Sace hi mayaṃ bho udena suṇeyyāma taṃ bhavantaṃ gotamaṃ dasasu yojanesu dasapi mayaṃ yojanāni gaccheyyāma taṃ bhavantaṃ gotamaṃ dassanāya arahantaṃ sammāsambuddhaṃ sace hi mayaṃ bho udena suṇeyyāma taṃ bhavantaṃ gotamaṃ vīsatiyā yojanesu ... Tiṃsatiyā yojanesu ... Cattāḷīsāya yojanesu ... paññāsāya yojanesu paññāsaṃpi mayaṃ yojanāni Gaccheyyāma taṃ bhavantaṃ gotamaṃ dassanāya arahantaṃ sammāsambuddhaṃ yojanasatepi mayaṃ bho udena suṇeyyāma taṃ bhavantaṃ gotamaṃ yojanasataṃpi mayaṃ gaccheyyāma taṃ bhavantaṃ gotamaṃ dassanāya arahantaṃ sammāsambuddhaṃ yato ca kho bho udena parinibbuto so bhavaṃ gotamo parinibbutaṃpi mayaṃ taṃ bhavantaṃ gotamaṃ saraṇaṃ gacchāma dhammañca bhikkhusaṅghañca upāsakaṃ maṃ bhavaṃ udeno dhāretu ajjatagge pāṇupetaṃ saraṇaṅgataṃ atthi ca me bho udena aṅgarājā devasikaṃ niccabhikkhaṃ dadāti tato ahaṃ bhoto udenassa ekaṃ niccabhikkhaṃ dadāmīti.
[645] Kiṃ pana te brāhmaṇa aṅgarājā devasikaṃ niccabhikkhaṃ dadātīti . pañcapi bho udena kahāpaṇasatānīti . na kho no brāhmaṇa kappati jātarūparajataṃ paṭiggahetunti . sace taṃ bho udena na kappati vihāraṃ bhoto udenassa kārāpessāmīti . Sace kho me tvaṃ brāhmaṇa vihāraṃ kārāpetukāmo pāṭaliputte saṅghassa upaṭṭhānasālaṃ kārāpehīti . imināhaṃ bhoto udenassa bhiyyoso mattāya attamano abhiraddho yaṃ maṃ bhavaṃ udeno saṅghe dāne samādapeti esāhaṃ bho udena etissā ca niccabhikkhāya aparāya ca niccabhikkhāya pāṭaliputte saṅghassa upaṭṭhānasālaṃ kārāpessāmīti. Atha kho ghoṭamukho brāhmaṇo etissā ca niccabhikkhāya aparāya ca niccabhikkhāya pāṭaliputte saṅghassa upaṭṭhānasālaṃ kārāpesi. Sā etarahi ghoṭamukhīti vuccatīti. Ghoṭamukhasuttaṃ niṭṭhitaṃ catutthaṃ. ---------